Korrupsiyaga qarshi kurashish agentligiga 2021-yilda tushgan jami 5 mingga yaqin murojaatning 7 foizi ichki ishlar organlari xodimlarining xatti-harakatlari va qarorlaridan norozilik aks etgan. Bu haqda Ichki ishlar vazirligida “Yangi O‘zbekistonni korrupsiyadan holi mamlakatga aylantirishda birlashaylik!” mavzusida tashkil etilgan anjumanda ma’lum qilindi, deb xabar beradi O‘zA.
Tadbirda korrupsiyaga qarshi kurashish borasida amalga oshirilayotgan islohotlar, shuningdek, Ichki ishlar vazirligi tizimida sodir etilgan korrupsiyaviy holatlar tahlil qilinib, ushbu illatga qarshi kurashish bo‘yicha ko‘rilishi lozim bo‘lgan ta’sirchan choralar muhokama qilingan.
Tahlillarga ko‘ra, 2020-yilda ichki ishlar organlarining 46 nafar xodimi korrupsiyaviy jinoyatlar sodir etgani uchun jinoiy javobgarlikka tortilgan bo‘lsa, 2021-yilda esa ushbu ko‘rsatkich deyarli ikki baravarga ortib, 89 nafar xodim tomonidan 119 korrupsiyaviy jinoyat sodir etilgan.
Shundan 47 tasi Jinoyat kodeksining 206-moddasi (hokimiyat yoki mansab vakolati doirasidan chetga chiqish), 18 tasi 209- va 211-moddalari (mansab soxtakorligi, pora berish), 14 tasi 168-moddasi (firibgarlik), 13 tasi 210-moddasi (pora olish) va qolgan 9 tasi boshqa korrupsiyaviy jinoyatlarni tashkil qilgan.
Avvalroq O‘zbekistonda 2021-yil davomida jami 2 345 ta jinoyat ishi bo‘yicha 2 804 nafar mansabdor shaxslar jinoiy javobgarlikka tortilgani to‘g‘risida xabar berilgandi.
Izoh (0)