Ijtimoiy tarmoqlarda “Chor Bakr” majmuidagi yer auksion savdoga qo‘yilgani to‘g‘risida xabarlar tarqaldi. Turizm va sport vazirligi huzuridagi Madaniy meros agentligi e’lon qilingan ma’lumotlarga munosabat bildirib, madaniy meros obyektining muhofaza tegralarida yer uchastkalari ijaraga va mulk huquqi asosida noqonuniy elektron onlayn-auksionga qo‘yilganini ma’lum qildi.
Madaniy meros inspeksiyasi hamda Madaniy meros agentligining ma’lum qilishicha, 2022-yil 17-yanvardagi Buxoro viloyatida xizmat tekshiruvi o‘tkazilishi natijasida Buxoro tumani “Shergiron” MFY hududida joylashgan davlat muhofazasiga olingan “Chor Bakr” (majmuasi) madaniy meros obyektining muhofaza tegralarida yer uchastkalari ijaraga va mulk huquqi asosida noqonuniy elektron onlayn-auksionga qo‘yilgani aniqlangan.
Buxoro viloyati Madaniy meros boshqarmasi tomonidan 7-yanvar kuni (03-m/21-sonli) Kadastr agentligining Davlat kadastrlar palatasi Buxoro viloyati boshqarmasiga yo‘llangan murojaat xatiga ko‘ra “Chor Bakr” majmuasi qo‘riqlanadigan tegrasidan 0,018 gektardan jami 6 ta (0,108 gektar) bo‘sh turgan yer uchastkasini “Yerelektron” avtomatlashtirilgan axborot tizimidan chiqarib tashlash choralarini ko‘rishni bildirgan.
Shuningdek, Buxoro viloyati madaniy meros boshqarmasi 10-yanvar kuni Buxoro tumani hokimiga, “Yerelektron” avtomatlashtirilgan axborot tizimiga qo‘yilgan 6 ta yer uchastkalarini auksiondan chiqarishda hamda “Chor Bakr” majmuasining muhofaza tegralarida tarixiy-madaniy muhiti, tabiiy landshafti va o‘ziga xosligini saqlab qolish maqsadida uning muhofaza tegralarida barcha turdagi yangidan amalga oshiriladigan qurilish-ta’mirlash ishlarini belgilangan tartibda Madaniy meros agentligi bilan kelishilgan holda olib borilishi yuzasidan murojaat yo‘llagan.
Mazkur holat yuzasidan materiallar huquqiy baho berish uchun huquqni muhofaza qiluvchi organlarga yuborilgan.
“Chor Bakr” majmuasi va uning muhofaza hududida hamda madaniy meros obyektlari va ularning tegralarida tegishli ruxsatnomalarni olmasdan yer qazish, yer tuzish, bino va inshootlarni qurish yoki ularni buzish ishlarini amalga oshirilgan taqdirda amaldagi qonun talablariga binoan javobgarlikka tortilishi haqida ogohlantirilgan.
Ushbu majmua YuNESKO Umumjahon merosi obyektlari ro‘yxatiga kiritish mutaxassislar ishtirokida, ilg‘or va yuqori texnologik uskunalardan foydalangan holda nomzodlik hujjatlari tayyorlanib, belgilangan tartibda YuNESKO Umumjahon merosi markaziga taqdim etilgan.
Holat yuzasidan Madaniy meros inspeksiyasi hamda Madaniy meros agentligi tomonidan XVI-XX asrlarga mansub bo‘lgan ushbu tarixiy yodgorlikning muhofaza qilinadigan tegralar hududidan ijaraga va mulk huquqi asosida 6 ta har biri 0,018 gektardan iborat yer uchastkalari berilishi amaldagi qonun hujjatlari talablariga zid ravishda elektron onlayn-auksion orqali sotuvga qo‘yilganligini inobatga olinib, holatga huquqiy baho berish maqsadida hujjatlar huquq-tartibot organi idoralariga yuborilgan.
Avvalroq Toshkent mahallalari YuNЕSKO Butunjahon madaniy merosining dastlabki ro‘yxatiga kiritilgani, Buxorodagi 7 ta tarixiy obida ICESCO’ning Islom olami merosi ro‘yxatiga kiritilgani to‘g‘risida xabar berilgandi.
Izoh (0)