Samarqand viloyati Payariq tumani “Dehqonobod” mahallasidagi 18-umumta’lim maktabi atrofidagi daraxtlarning kesib tashlangani to‘g‘risida xabar berilgan. Tuman hokimligi axborot xizmati “Daryo”ga mazkur holat bo‘yicha mas’ullar javobgarlikka tortilganini ma’lum qildi.
Ta’kidlanishicha, Payariq tumani “Istiqlol” mahallasida joylashgan 18-umumta’lim maktabi (“Daryo”ning jurnalistik surishtiruvida ushbu maktab “Dehqonobod” mahallasida joylashgan deb ko‘rsatilgan edi) hududidagi “nosog‘lom” bahonasi bilan daraxtlar ruxsatsiz kesilgani ma’lum bo‘lgan. Maktab direktori Saidahmad Salimov hamda xo‘jalik ishlari bo‘yicha direktor o‘rinbosari To‘lqin Shamsiyevga tegishli tartibda intizomiy jazo chorasi qo‘llanilgan.
Teraklarning kesilishiga mas’ul bo‘lgan maktabning chaqiriqqa qadar yoshlarni tayyorlash rahbari Ixtiyor Hamidovga tuman ekologiya va atrofni muhofaza qilish bo‘limi tomonidan Ma’muriy javobgarlik to‘g‘risidagi kodeksining tegishli moddalari asosida 1,35 million so‘m miqdorda jarima qo‘llanilgan.
Shunindek, maktabning eski binosi o‘rnidagi xandaqning ichidagi axlatlarning to‘planishida e’tiborsizlikka yo‘l qo‘ygan maktab direktori Saidahmad Salimov hamda xo‘jalik ishlari bo‘yicha direktor o‘rinbosari To‘lqin Shamsiyevga tegishli tartibda Ma’muriy javobgarlik to‘risidagi kodeksining 91-moddasi 1-qismlari bilan BHMning 10 baravari miqdorida (2,7 million so‘m) jarima qo‘llanilgan.
Bundan tashqari, maktabning xo‘jalik ishlari bo‘yicha direktor o‘rinbosari To‘lqin Shamsiyev o‘z ishiga mas’uliyat bilan yondoshmagani sababli egallab turgan lavozimidan ozod etilgan.
Avvalroq Qarshi davlat universitetida 40 ga yaqin daraxt kesib tashlangani va Bosh prokuratura holatni o‘rganishni boshlagani to‘g‘risida xabar berilgandi.
Izoh (0)