Ijtimoiy tarmoqlarda Respublika shoshilinch tibbiy yordam ilmiy markazi mutaxassislari tomonidan o‘tkazilgan murakkab operatsiya jarayoni lavhalari tarqaldi. Sog‘liqni saqlash vazirligining ma’lum qilishicha, videoda 17 yoshli yigitning baxtsiz hodisa sabab jiddiy jarohat olgani, tibbiyot xodimlari uning tanasiga kirib ketgan armatura bo‘lagini murakkab jarrohlik yo‘li bilan chiqarib, bemorning hayotini saqlab qolgani aks etgan.
Ma’lum qilinishicha, 2021-yilning 20-dekabr kuni soat 11:00 larda 17 yoshli R.S. og‘ir ahvolda va hushsiz holda shifoxonaga olib kelingan. Bemor tanasiga qurilish jarayonida ikkinchi qavatdan yiqilib tushishi oqibatida diametri 15 millimetrlik ikkita armatura bo‘lagi kirib ketgan.
Respublika shoshilinch tibbiy yordam ilmiy markazi qabul bo‘limida bir qancha mutaxassislar ko‘rigidan so‘ng bemorning bosh miya, bo‘yin, ko‘krak va bel-umurtqa sohalari, ko‘krak qafasi, qorin bo‘shlig‘i a’zolari MSKT qilingan. Shuningdek, qorin bo‘shlig‘i va ko‘krak qafasi ultratovush tekshiruvidan o‘tkazilgan.
“Metall parchasi bemor ko‘krak qafasining o‘ng orqa yuzasi, 7 va 9-qovurg‘alari orasidan kirib, 6-ko‘krak umurtqasini teshib o‘tgan va orqa miya ezilishiga sabab bo‘lgan. So‘ngra o‘ng o‘mrovosti arteriyasi tagidan o‘tib, bosh suyagi miya asosining o‘rta chuqurchasini teshib kirgan”, — deydi ushbu markaz direktori Doniyor Alimov.
Bosh miya o‘rta darajada lat yegan. Bundan tashqari, o‘ng chakka suyagi va orqa miyaning ochiq, teshib o‘tgan jarohati, 6-ko‘krak umurtqasining maydalanib sinishi kabi o‘ta og‘ir shikastlanishlar bemor hayotiga xavf solib turgan. Shu sababli markazning kardioxirurg, neyroxirurg, torokal va umumiy jarroh, travmatolog, anesteziolog va reanimatolog kabi o‘ndan ortiq eng malakali mutaxassislari tomonidan 5 soatdan ziyod vaqt davomida amaliyotda kam uchraydigan murakkab jarrohlik operatsiyasi muvaffaqiyatli o‘tkazilgan. Natijada bemorning hayoti saqlab qolingan.
“Bu baxtsiz hodisa haqida eshitganimda o‘zimni yo‘qotib qo‘ydim. O‘zimdan o‘tganini o‘zim bilaman. Bolamning hayotini saqlab qolgan shifokorlardan butun umr minnatdorman”, — deydi bemorning onasi R.Rajabova.
Ta’kidlanishicha, hozirda uning ahvoli qoniqarli, gemodinamik ko‘rsatkichlari barqaror bo‘lib, muolaja jarayonlari davom ettirilmoqda.
“Milliy” telekanalining Toshkent shahar IIBBga tayanib ma’lum qilishicha, holat yuzasidan Shayxontohur tumani IIO FMB Tergov bo‘limi tomonidan Jinoyat kodeksining 257-moddasi (mehnatni muhofaza qilish qoidalarini buzish) bilan jinoyat ishi qo‘zg‘atilgan. Hozirda tergov harakatlari davom etmoqda.
Izoh (0)