Хитойнинг Вьетнам билан чегарага яқин жойлашган Байсе шаҳри (Гуанси-Чжуан автоном тумани) маъмурияти COVID-19 га чалиниш ҳолатларининг ортиши муносабати билан шаҳарда 7 февралдан локдаун жорий этилганини эълон қилди. Бу ҳақда «Интерфакс» хабар берди.
3,6 миллион аҳолига эга шаҳарда ўтган икки кун давомида коронавирусни маҳаллий юқтириш бўйича 99 та ҳолат қайд этилган. Шулардан иккитаси коронавируснинг янада юқумлироқ омикрон штаммига тўғри келади.
Расмийларнинг буйруғига кўра, аҳоли уйда қолиши, фақат энг зарур нарсаларни сотиб олиш ва COVID-19 га тест топшириш учун кўчага чиқиши керак. Шунингдек, аҳолидан товарларни уйга етказиб бериш хизматидан фойдаланиш, дўконларга бормаслик сўралди. Мактаблар фаолияти тўхтатилди.
Вақтинчалик тақиқ барча сафарлар (ўта зарур ҳолатлардан ташқари) билан бирга жамоат транспорти фаолиятига ҳам жорий этилди, ҳудуддаги халқаро чегара ёпилди. Ҳаёт учун зарур хизмат кўрсатиш соҳаларининг ишчилари Байсе бўйлаб фақат махсус йўлланмалар билан ҳаракатланиши мумкин.
ОАВ таъкидлашича, Байсе шаҳридаги локдаун Пекинда 4—20 февраль кунлари давом этадиган қишки Олимпия ўйинлари ва Ой тақвими бўйича янги йил муносабати билан юзага келган саёҳат мавсуми фонида жорий қилинган.
Маълумотларга кўра, Хитойнинг камида 10 та провинцияси ва ҳудудларида омикрон штамми аниқланган.
2022 йил бошида Хитойда 1,2 миллион аҳолига эга Ючжоу шаҳри, ундан аввал 13 миллион аҳолига эга Sian шаҳри локдаунга ёпилганди.
Изоҳ (0)