Бухоро вилоятидаги чегара постлардан ҳужжатларда кўрсатилмаган салкам 1,5 миллиард сўмлик маҳсулотларни яширин равишда олиб ўтишга уринган шахслар ушланди. Бу ҳақда «Дарё»га вилоят Божхона бошқармаси ахборот хизмати раҳбари Жавоҳир Исмоилов хабар берди.
Таъкидланишича, Туркманистон ҳамда Ўзбекистон давлатларини чегаралаб турувчи «Хўжадавлат» темир йўл чегара божхона пости ходимлари қўшни мамлакатдан кириб келган темир йўл вагонларини белгиланган назоратдан ўтказган. Бунда вагонларда олиб келинаётган юклар орасида юк-кузатув ҳужжатларида кўрсатилмаган 1,5 тонна оғирликдаги силикон мойи борлиги ҳамда мазкур товарнинг умумий қиймати 1 миллиард 143 миллион сўмдан иборат экани аниқланган.
Матбуот котибининг сўзларига кўра, ушбу ҳолат расмийлаштирилаётган пайтда «Олот» чегара божхона пости ходимлари томонидан хорижий давлатдан кириб келган юк автомашиналари ҳам белгиланган тартибда божхона назоратидан ўтказилган. Қўшни давлатдан кириб келган фуқаро Ч.Р.га тегишли юк автомашинаси тиркамасидаги пойабзалга сепиш учун фойдаланиладиган спрей товарлари ҳужжатларда кўрсатилганидан 1,7 тонна ортиқча экани аниқланган. Товарнинг айнан ҳужжатда кўрсатилмаган қисмининг қиймати салкам 217 миллион сўмни ташкил этган.
«Бундан ташқари, ушбу транспорт воситасида ҳужжатларда кўрсатилмаган жами 90 миллион сўмли 36 минг дона болалар сумкалари ҳам борлиги аниқланди. Ҳозирда юқоридаги ҳолатлар юзасидан божхона органлари томонидан суриштирув ҳаракатлари давом эттирилмоқда», — дейди Жавоҳир Исмоилов.
Изоҳ (0)