Sudyalar oliy kengashi matbuot xizmati ma’lumotlariga ko‘ra, 2021-yilda Sudyalar oliy kengashi qarori bilan 38 nafar sudyaning vakolati muddatidan ilgari tugatilib, vazifasidan ozod etildi. Bu haqda “Xalq so‘zi online” xabar qildi.
Qayd etilishicha, shundan 19 nafari sudyalik qasamyodi va “Sudyalar odobi kodeksi” talablarini buzgani uchun, 8 nafari o‘z xohishiga ko‘ra, 8 nafari boshqa ishga o‘tgani, 3 nafari esa vafot etgani munosabati bilan vakolati muddatidan ilgari tugatilgan. O‘tgan yilda 220 nafar sudya boshqa turdagi intizomiy javobgarlikka tortilgan.
“2022-yildan boshlab tizimda ochiqlik hamda shaffoflikni ta’minlash orqali sudyalarning mas’uliyatini yanada oshirish maqsadida yo‘l qo‘ygan kamchiliklari uchun intizomiy javobgarlikka tortilganlar haqida ham muntazam ochiq axborot berib borilmoqda”, — deyiladi xabarda.
Xususan, 3-fevral kuni yo‘l qo‘ygan kamchiliklari va mas’uliyatsizligi uchun fuqarolik ishlari bo‘yicha Buxoro tumanlararo sudining sudyalari A.Bahromov va H.Saidov, Buxoro tumanlararo iqtisodiy sudi sudyasi F.Murodov, jinoyat ishlari bo‘yicha Yangiyo‘l tuman sudi sudyasi Sh.Amirov, jinoyat ishlari bo‘yicha Buxoro shahar sudining sudyasi A.Jabborov, fuqarolik ishlari bo‘yicha Nukus tumanlararo sudining sudyasi Sh.Abdijemilova, jinoyat ishlari bo‘yicha Nukus shahar sudining sudyalari I.Kalniyazov va M.Bekimbetov, fuqarolik ishlari bo‘yicha Ohangaron tumanlararo sudining sudyasi D.Shomatova, fuqarolik ishlari bo‘yicha Quyi Chirchiq tumanlararo sudining sudyasi J.Bobonazarov intizomiy javobgarlikka tortilgan.
Shuningdek, tizim tarixida birinchi marta joriy etilgan “Ibratli sudya” mukofotining ilk 16 nafar sohibi aniqlanib, mukofotlar egalariga topshirilgan.
Izoh (0)