Senatning 23-yalpi majlisida senatorlar Internet jahon axborot tarmog‘ida yoshlar va voyaga yetmaganlar uchun milliy kontentni rivojlantirish, ularning ijtimoiy tarmoqlardan foydalanish va zararli axborotdan himoya qilish to‘g‘risida Vazirlar Mahkamasiga parlament so‘rovi yuborish to‘g‘risida qaror qabul qildi. Mazkur jarayon haqida Senatning Axborot siyosati va davlat organlarida ochiqlikni ta’minlash masalalari qo‘mitasi raisi o‘rinbosari Farhod Boqiyev majlis yakunlari yuzasidan o‘tkazilgan matbuot anjumanida izoh berdi, deb xabar bermoqda “Daryo” muxbiri.
“Har birimiz ota-ona sifatida farzand tarbiyalab kelyapmiz. Shuni taroziga qo‘yib o‘ylab ko‘rsak, parlament so‘rovi bugungi kunning aktual masalasi ekanligi ko‘rinadi. YouTube platformasiga farzandingiz bilan kirib ko‘rsangiz uyalib qolasiz. Ma’naviyatimizga zid bo‘lgan kontentlar joylashtirilgan. Vazirlar mahkamasiga 10 ta masalani qo‘ydik. Bu yerda axborotni cheklash haqida gap ketmayapti, axborotni cheklab ham bo‘lmaydi”, — deydi u.
Farhod Boqiyevning aytishicha, “bugungi kunda axborotning rangi ham, og‘irligi ham, o‘lchami ham, chamadonga o‘xshab ushlaydigan joyi ham yo‘q”.
“Biz uni ushlab to‘xtata olmaymiz yoki qulog‘imizga eshitmagin, ko‘zimizga ko‘rmagin, deb buyruq berolmaymiz. Biz axborotni o‘qib o‘zimiz tafakkurimizda tahlil qilib olaveramiz. Davlat rahbari tomonidan 2017-yilda aniq mexanizm ilgari surilgan, bu – beshta muhim tashabbus. Milliy kontentlarni yaratib, ko‘paytirsak, Wikipedia’ni yangilasak, uning bazasini kengaytirsak O‘zbekiston haqida ma’lumotlar olish ham osonlashadi, Xalqaro hamjamiyatda O‘zbekiston haqida ma’lumotlar ham ko‘payadi. Bu yerda ijtimoiy tarmoqlarni bloklash haqida gap ketmayapti”, — deya qo‘shimcha qiladi Senatning Axborot siyosati va davlat organlarida ochiqlikni ta’minlash masalalari qo‘mitasi raisi o‘rinbosari.
Eslatib o‘tamiz, 2021-yil iyul oyida O‘zbekistonda TikTok va Twitter’ning ochilishi sekinlashdi. 2-iyul kuni esa O‘zbekistonda ayrim ijtimoiy tarmoqlar, xususan, TikTok’dan foydalanish rasman cheklandi.
Keyinchalik “Milliy tiklanish” demokratik partiyasi Markaziy kengashi raisi o‘rinbosari Feruza Muhammadjonova hamda “Adolat” partiyasi TikTok ijtimoiy tarmog‘ini butunlay bloklashni taklif qildi.
Toshkent shahar hokimi “Toshkent yoshlar forumi — 2020” doirasida bo‘lib o‘tgan matbuot anjumanida “tiktokerlarga taqiq qo‘yish emas, ularni to‘g‘ri yo‘lga yo‘naltirish bo‘yicha ish olib borishimiz kerakligi” haqida aytgan edi.
“TikTok bir platforma, u yerda turli kontent bor. Hamma o‘ziga kerakli kontent oladi. Ming afsuski, taqiq qo‘yilgan odamlar kerakmas kontentlarga kirgani ko‘rinib turibdi. Agar kerakli kontentlarga kirilsa, hech qanday platformaning zarari yo‘q, deb o‘ylayman. Mening fikrimcha, tag‘in bilmadim”, — degan edi hokim “Toshkent yoshlar forumi – 2021” doirasida bo‘lib o‘tgan matbuot anjumanida.
Izoh (0)