Судьялар олий кенгаши матбуот хизмати маълумотларига кўра, 2021 йилда Судьялар олий кенгаши қарори билан 38 нафар судьянинг ваколати муддатидан илгари тугатилиб, вазифасидан озод этилди. Бу ҳақда «Халқ сўзи online» хабар қилди.
Қайд этилишича, шундан 19 нафари судьялик қасамёди ва «Судьялар одоби кодекси» талабларини бузгани учун, 8 нафари ўз хоҳишига кўра, 8 нафари бошқа ишга ўтгани, 3 нафари эса вафот этгани муносабати билан ваколати муддатидан илгари тугатилган. Ўтган йилда 220 нафар судья бошқа турдаги интизомий жавобгарликка тортилган.
«2022 йилдан бошлаб тизимда очиқлик ҳамда шаффофликни таъминлаш орқали судьяларнинг масъулиятини янада ошириш мақсадида йўл қўйган камчиликлари учун интизомий жавобгарликка тортилганлар ҳақида ҳам мунтазам очиқ ахборот бериб борилмоқда», — дейилади хабарда.
Хусусан, 3 февраль куни йўл қўйган камчиликлари ва масъулиятсизлиги учун фуқаролик ишлари бўйича Бухоро туманлараро судининг судьялари А.Баҳромов ва Ҳ.Саидов, Бухоро туманлараро иқтисодий суди судьяси Ф.Муродов, жиноят ишлари бўйича Янгийўл туман суди судьяси Ш.Амиров, жиноят ишлари бўйича Бухоро шаҳар судининг судьяси А.Жабборов, фуқаролик ишлари бўйича Нукус туманлараро судининг судьяси Ш.Абдижемилова, жиноят ишлари бўйича Нукус шаҳар судининг судьялари I.Калниязов ва М.Бекимбетов, фуқаролик ишлари бўйича Оҳангарон туманлараро судининг судьяси Д.Шоматова, фуқаролик ишлари бўйича Қуйи Чирчиқ туманлараро судининг судьяси Ж.Бобоназаров интизомий жавобгарликка тортилган.
Шунингдек, тизим тарихида биринчи марта жорий этилган «Ибратли судья» мукофотининг илк 16 нафар соҳиби аниқланиб, мукофотлар эгаларига топширилган.
Изоҳ (0)