O‘zbekiston Ichki ishlar vazirligi jamoat xavfsizligi departamenti ijtimoiy tarmoqlarda haydovchilik guvohnomasi olish uchun o‘tkaziladigan imtihonlar haqida tarqalgan turli xil ma’lumotlar yuzasidan rasmiy bildirish e’lon qildi.
Qayd etilishicha, Vazirlar Mahkamasining 2021-yil 4-maydagi “Avtomototransport vositalarini boshqarish huquqini beruvchi haydovchilik guvohnomalarini olish uchun imtihonlarni o‘tkazish sohasiga xususiy sektorni jalb etishga doir qo‘shimcha chora-tadbirlar to‘g‘risida”gi VMQ 272-son qarori tasdiqlandi.
“Yuqoridagi qarorlar asosida haydovchilik guvohnomasini olish uchun nazariy va amaliy imtihonlarni o‘tkazish huquqiga ega bo‘lish uchun tadbirkorlik subyektlari zimmasiga ma’lum bir talablar belgilab qo‘yilgan.
Bunda, eng avvalo, imtihonlar inson omilisiz, to‘liq avtomatlashtirilgan holda amalga oshirilishi, zamonaviy avtodrom mavjudligi, maxsus himoyalangan dasturiy ta’minotlar kompleksiga egaligi hamda imtihonlar jarayonida olingan ma’lumotlarga hamda imtihon natijalariga o‘zgartirish kiritish imkoniyatining cheklanganligi va boshqa shu kabi talablar o‘rnatilgan.
Ushbu talablarga to‘laqonli javob beradigan imtihon tizimi uchun sarmoya kiritgan istalgan tadbirkorlik subyekti litsenziya olish uchun ariza topshirishi mumkin. Bunda hech bir tadbirkorlik subyektiga cheklov yoki to‘siq yo‘qligini ma’lum qilamiz”, — deyiladi departament xabarida.
Eslatib o‘tamiz, 3-fevral kuni Toshkentda haydovchilik guvohnomasini olish uchun imtihon topshirish bo‘yicha Toshkent imtihon markazi ish boshladi.
Ichki ishlar vaziri o‘rinbosari, jamoat xavfsizligi departamenti boshlig‘i Bekmurod Abdullayev faqat yetarli bilim va malakaga ega haydovchilarga guvohnoma berilishni boshlagach, yo‘llarda haydovchilik madaniyati oshadi, yo‘l-transport hodisalari kamayishini aytib o‘tdi.
Izoh (0)