Joriy yildan boshlab Toshkent shahar ichki ishlar organlari xodimlari zarurat tug‘ilganda o‘qotar tabel quroliga muqobil tarzda elektroshok qurilmalaridan foydalanishlari mumkin. Bu haqda shahar Ichki ishlar bosh boshqarmasi xabar qildi.
Qayd etilishicha, me’yoriy hujjatlarga muvofiq, Toshkent shahar IIBB xodimlari jamoat tartibini saqlash, jinoyatlarning oldini olish va huquqbuzarliklar profilaktikasi maqsadida ushbu uskunalar bilan ta’minlangan. “Elektroshok qurilmalar huquq-tartibot himoyachilarining faol himoya vositasi bo‘lib, turli huquqbuzarliklar sodir etgan, huquqni muhofaza qilish organlari xodimining qonuniy talablariga bo‘ysunmagan yoki unga faol qarshilik ko‘rsatgan shaxslarga nisbatan qo‘llanilishi mumkin”, — deyiladi xabarda.
Huquqni muhofaza qilish organlari xodimlari “Qurol to‘g‘risida”gi va “Ichki ishlar organlari to‘g‘risida”gi qonunlarga muvofiq maxsus vositalar, shu jumladan, elektroshok qurilmalaridan foydalanish huquqiga ega hisoblanadi. Vazirlar Mahkamasining “Elektroshok qurilmalar, uchqun chiqargichlar va shikast yetkazuvchi ta’siri elektr energiyasidan foydalanishga asoslangan boshqa qurilmalarning chiqish parametrlari muvofiqligi lozim bo‘lgan normalarni tasdiqlash to‘g‘risida”gi qarori va ichki ishlar vazirining tegishli buyrug‘i asosida xodimlar bilan o‘quv mashg‘ulotlari o‘tkazilgan va sinov imtihonlarini muvaffaqiyatli topshirganlarga sertifikatlar topshirilgan.
Eslatib o‘tamiz, O‘zbekistonda 24-sentabrdan boshlab ichki ishlar organlari xodimlari tomonidan elektroshokerdan foydalanish boshlangandi. Avvaliga Farg‘ona, so‘ng Surxondaryo IIB xodimlariga elektroshok qurilmalari topshirildi.
Izoh (0)