Davlat xavfsizlik xizmati Namangan viloyati boshqarmasi xodimlari tomonidan o‘tkazilgan tezkor tadbir davomida Qirg‘izistondan aylanma yo‘llar orqali katta miqdordagi tovar-moddiy boyliklarni mamlakat hududiga olib kirgan shaxs qo‘lga olindi. Bu haqda “Daryo” muxbiri Azizbek Abduvaliyev xabar bermoqda.
Tadbir davomida Yangiqo‘rg‘on tumanida yashovchi 1994-yilda tug‘ilgan Alisher Turaliyevning (ism-shariflar shartli) yashash xonadoni xolislar ishtirokida ko‘zdan kechirilgan va 94 ta qutida Xitoyda ishlab chiqarilgan mobil aloqa vositalari ehtiyot qismlari borligi aniqlangan. Xonadondagi Cobalt rusumli avtomobilda esa yana 134 ta qutida shunday ehtiyot qismlar borligi ma’lum bo‘ldi.
Redmi, Samsung va boshqa rusumdagi uyali aloqa apparatlarining 3468 dona sensor ekrani tegishli tartibda rasmiylashtirib olindi. Xorijdan noqonuniy olib kirilgan tovar-moddiy boyliklarning umumiy qiymati 636 million 371 ming so‘mni tashkil etdi.
Dastlabki surishtiruvlar davomida fuqaro mazkur mahsulotlarni Toshkentdagi jinoiy sheriklariga yetkazish bilan shug‘ullanib kelgani aniqlandi.
Hozirda ushbu holat yuzasidan JKning 182-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda.
Izoh (0)