Andijonda bezorilik va zo‘ravonlik bilan shug‘ullanuvchi 28 yoshli ayolga to‘rtinchi marta sud hukmi o‘qildi

Andijon viloyati Asaka tumanda bezorilik va zo‘ravonlik bilan shug‘ullanuvchi 28 yoshli ayolga to‘rtinchi marotaba sud hukmi o‘qildi. Bu haqda “Daryo”ga Andijon viloyati sudi matbuot xizmati ma’lum qildi.

Jinoyat ishlari bo‘yicha Asaka tumani sudi raisi Rahmatillo Rahimovning ma’lum qilishicha, muqaddam uch marotaba sudlangan N.B. (1994-yilda tug‘ilgan) 2021-yil 15-aprel kuni soat 10:00 larda “Mehnatobod” mahallasida fuqaro D.S.ning yo‘lini to‘sib, yuz qismiga qo‘li bilan urib, unga nisbatan hayot va sog‘liq uchun xavfli bo‘lmagan zo‘rlik ishlatgan holatda, jabrlanuvchining qo‘lida bo‘lgan Redmi 7 telefon apparatini olib qo‘ygan.

Shuningdek, N.B. o‘zining jinoiy harakatlarini davom ettirib, 10-may kuni soat 13:30 larda tumanning “Beruniy” mahallasida fuqaro M.U.ni urib, uning qo‘lida bo‘lgan bir dona 3 million 500 ming so‘mlik Vivo-1915 telefoni hamda 100 dollar miqdoridagi pulni zo‘rlik ishlatib olib qo‘ygan.

Bundan tashqari, N.B. 2021-yilning 1-may kuni soat 12:00 atrofida jamoat joyi hisoblanadigan Asaka tuman aholi bandligiga ko‘maklashish markazida xodimi N.K. bilan hech bir sababsiz janjallashib, uni urib-do‘pposlagan. Qo‘lida bo‘lgan g‘isht bo‘lagi bilan yana bir fuqaro R.K.ni chap qo‘liga urib, shikast yetkazgan. Ajratmoqchi bo‘lgan fuqarolar Sh.S. va D.Y.ga qarshilik ko‘rsatib, ularni ham sababsiz urib, tan jarohati yetkazgan. Markaz hisobxonasidagi monoblok, kompyuter hamda stol-stullarni uloqtirib zarar yetkazgan. Bino atrofida turgan I.T. boshqaruvidagi Malibu mashinasiga ham tosh va g‘isht bo‘laklarini otib, avtomashinani old oynasini sindirib, texnik shikast yetkazgan.

Sud hukmi bilan B. N. Jinoyat kodeksining 166-moddasi (talonchilik) 3-qismining “a” bandi, 277-moddasi (bezorilik) 3-qismining “a, g” bandlari, 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 1-qismida nazarda tutilgan jinoyatlarni sodir etganlikda aybli deb topilgan. Unga nisbatan 2 million 230 ming so‘m jarima hamda 3 yil 6 oy muddatga ozodlikdan mahrum qilish jazosi tayinlangan.

Undan Asaka tumani aholi bandligiga ko‘maklashish markazi foydasiga 5 million 610 ming so‘m, jabrlanuvchi I.T. foydasiga esa 645 ming so‘m moddiy zarar undirish belgilangan.