Farg‘ona shahrida internet orqali bir ayolning ishonchiga kirib, uning pullarini aldov yo‘li bilan qo‘lga kiritgan shaxs ushlandi, deb xabar beradi viloyati IIB matbuot xizmati.
2021-yilning 30-dekabr kuni A.G. ismli ayol IIBga murojaat qilib, noma’lum shaxs bilan ijtimoiy tarmoqlar orqali tanishgani va u o‘zining ishonchini suiiste’mol qilish orqali internetda o‘ynaladigan tavakkalchilikka asoslanadigan o‘yin uchun 30 million so‘m pulini tushirib olganini bildirgan.
Mazkur holat yuzasidan Farg‘ona shahar IIO FMB huzuridagi tergov bo‘limi tomonidan Jinoyat kodeksining 168-moddasi 3-qismi “v” bandi (firibgarlik) bilan jinoyati ishi qo‘zg‘atilgan.
Olib borilgan tezkor qidiruv harakatlari davomida ushbu jinoyatni T.I. sodir etgani aniqlanib, protsessual tartibda ushlangan.
Qonunchilikka ko‘ra, bu kabi jinoyatni sodir etgan shaxs uch yilgacha ozodlikdan mahrum qilish bilan jazolanishi mumkin.
Avvalroq O‘zbekistonda 2021-yilda totalizator va bukmekerlikni reklama qiluvchi 30 dan ortiq sayt bloklangani, Xorazmda totalizator orqali qo‘lga kiritgan 4 ta uy va 3 ta mashinani farzandlari nomiga rasmiylashtirgan fuqaroga jinoyat ishi qo‘zg‘atilgani, O‘zbekistonlik ayol erining 400 mln so‘mini totalizatorda yutqazib qo‘ygani to‘g‘risida xabar berilgandi.
Izoh (0)