2022 йилда саёҳат қилиш учун энг хавфли мамлакат сифатида Венесуэла тан олинди. Бу ҳақда турли давлатлардаги жиноятчилик статистикасини таққословчи Numbeo таҳлилий сервиси маълумотларида келтирилган. Ҳисоботнинг тўлиқ рўйхати билан ташкилотнинг расмий сайти орқали танишиш мумкин.
Мутахассисларнинг маълумотларига кўра, Венесуэлада жиноятчилик индекси 83,58 баллни ташкил этмоқда, хавфсизлик индекси эса мос равишда 16,42 баллга тенг. Антирейтингдан иккинчи ўринни Папуа-Янги Гвинея эгаллаган — мамлакатдаги жиноятчилик индекси 81 баллга баҳоланган. Ундан кейинги ўринни Афғонистон (77 балл) ва Жанубий Африка (76 балл) банд этган.
Бундан ташқари, Гондурас (74,1 балл), Тринидад ва Тобаго (71,3 балл), Гаяна (68,9 балл), Салвадор (68,6 балл), Ямайка (67,8 балл) ҳам сайёҳлар учун хавфли мамлакатлар қаторига киритилган. Топ-10 рўйхатга туристлар максимал даражада эҳтиёт бўлиши керак бўлган Сурия киритилган — 67,4 балл. Ўзбекистон эса 33,76 балл билан рейтингнинг 105-поғонасини эгаллаган.
Аввалроқ Numbeo портали яшаш учун энг қиммат ва энг арзон мамлакатлар 2022 йилги рейтингини эълон қилганди. Рўйхатнинг дастлабки учта поғонасидан Бермуд ороллари (146,04), Швейцария (123,35) ва Норвегия (100,9) эгаллаган бўлса, охирги ўринларни Ҳиндистон (24,43), Афғонистон (20,37) ҳамда Покистон (19,92) банд этган.
Изоҳ (0)