Qirg‘iziston va Tojikiston chegara hududlaridan birida ikki davlat harbiylari o‘rtasida otishma yuz berdi. Bu haqda Qirg‘iziston milliy xavfsizlik qo‘mitasining davlat chegara xizmati axborotiga tayanib, “TASS” xabar qilgan.
“Qirg‘iz-tojik chegarasida keskin vaziyat hukmronlik qilmoqda. Qirg‘iziston va Tojikiston chegara xizmatlari olib borgan muzokaralar yakuniga ko‘ra Botken–Isfara yo‘nalishida Tojikiston fuqarolari tomonidan to‘sib qo‘yilgan To‘rt-Ko‘cho qishlog‘i yo‘li yana qayta ochilgan”, – deyiladi chegara xizmatining xabarida.
“Ammo mahalliy vaqt bilan soat 19:35 da (Toshkent vaqti bilan 18:35) Botken tumanining Chir-Dobo qishlog‘i yaqinida tojik tomoni o‘qotar quroldan foydalangani va qirg‘iz chegarachilariga o‘q uzgani tufayli vaziyat yana yomonlashgan. To‘rt-Ko‘cho va Chir-Dobo qishloqlari hududida Qirg‘iziston va Tojikiston chegara qo‘shinlarining askarlari ishtirokida o‘zaro otishmalar kuzatilgan. Tojik tomoni minomyotlar va granatomyotlardan foydalangan”, – deyiladi xabarda. Halok bo‘lganlar yoki yaralanganlar haqida ma’lumot berilmagan.
Tojikiston chegarasiga yaqin hududdagi qishloqlarda yashovchi aholi keskin vaziyat tufayli o‘z xonadonlarini tark etgan, deyiladi “24.kg” xabarida.
“Chegarachilar o‘rtasidagi nizo sodir bo‘lgan hududga yaqin qishloqlarda yashaydigan odamlar xonadonlarini tark etmoqda”, deyiladi xabarda. Shuningdek, agentlikning yozishicha qirg‘iz-tojik chegarasi uchastkalaridan biridagi otishma hanuz davom etmoqda.
Qirg‘izistonning Botken viloyati ma’muriyati bergan ma’lumot bo‘yicha konflikt kuzatilgan hududda avvalo ayollar, bolalar va keksa yoshli kishilar xavfsiz joyga o‘tkazilgan.
Voqea joyiga Botken viloyati davlat xavfsizlik xizmati qo‘mitasi chegara xizmati boshlig‘i Qiyalbek To‘lanbayev va Botken chegara otryadi rahbari Rustam Mirshakirov yetib kelgan. “Mazkur hududdagi Botken viloyatining chegara bo‘linmalari kuchaytirilgan tartibga o‘tkazilgan”, – deyiladi idora bayonotida.
Tojikiston chegara xizmati xodimlari ham Qirg‘iziston bilan chegarada sodir bo‘lgan hodisa tufayli kuchaytirilgan tartibga o‘tkazilgan va bu haqda mamlakat maxsus xizmatlaridagi manba “TASS”ga ma’lum qilgan.
“Tojik-qirg‘iz chegarasida yuzaga kelgan keskinlik sababli Tojikiston chegara xizmati xodimlari xizmatni o‘tashning kuchaytirilgan tartibiga o‘tkazilgan”, – deya agentlikka ma’lumot bergan Tojikiston hukumatidagi manba.
Uning so‘zlariga ko‘ra, ikkala tomonning ham mahalliy hokimiyat vakillari nizoni hal etish yuzasidan tegishli ishlarni amalga oshirmoqda.
Keyinroq yana Qirg‘iziston davlat xavfsizlik qo‘mitasining chegara xizmati yana bir bayonot bilan chiqish qildi va tojik chegarachilari otishmani to‘xtatishni istamayotgani, ular tomonidan ikki tomonlama kelishuvlar, xalqaro huquq me’yorlariga zid bo‘lgan Tojikiston Qurolli kuchlarining qurollari ishlatilayotganini qayd etdi. Tojikiston minomyotlardan muayyan nishonga aniq o‘t ochayotgani, asosan, chegara zastavalari va elektr tarmoq liniyalariga hujum qilinayotganini bildirdi.
Asia-Plus nashri Isfara shahri yaqinidagi Somoniyon qishlog‘ida chegaradagi nizo tufayli yaralanganlar soni 11 nafarga yetganini xabar qildi. Xabarga ko‘ra, o‘qotar quroldan yaralangan 8 nafar harbiy va uch nafar fuqaro shifoxonaga yotqizilgan. Ularning holat barqaror va jabrlanganlarga travmatologiya bo‘limlarida tibbiy yordam ko‘rsatilgan. “AKIpress” esa Qirg‘iziston tomonda 4 nafar harbiyga jarohat yetganini bildirgan. Ular Ko‘k Toshdan Botkendagi viloyat shifoxonasiga olib ketilgan. Harbiylar oskolka, ya’ni minomyot zarbasidan keyin uchib kelgan parcha tegishi oqibatida yaralangan.
Kollektiv xavfsizlik shartnomasi tashkiloti bosh kotibi Stanislav Zas tojik va qirg‘iz tomonlarini jangovar harakatlarni darhol to‘xtatishga chaqirgan. Bu haqda KXShT matbuot kotibi Vladimir Zaynetdinov ma’lum qilgan. Zas Tojikiston xavfsizlik kengashi kotibi Nasrullo Mahmudzoda hamda Qirg‘iziston xavfsizlik kengashi kotibi Marat Imankulov bilan telefon orqali suhbatlashgan.
Tojikiston va Qirg‘iziston o‘rtasidagi bu kabi nizolar 1990-yillardan buyon kuzatiladi, ularga ikki davlat o‘rtasida 950 kilometr chegara hududi belgilab olinmagan va unda ikki tomon kelisha olmayotgan bahsli joylar juda ko‘p. Chegarani demarkatsiya va delimitatsiya qilish yuzasidan muzokaralar 2002-yilda boshlangan va shu kunga qadar ikki yuzdan ziyod komissiya yig‘ilishlari o‘tkazilib, ishchi guruhlar tuzilgan. Ayni vaqtda delimitatsiya va demarkatsiya qilish bo‘yicha chegaraning 550 kilometrga yaqin liniyasi tartibga solinishi boshlangan. Biroq ikki mamlakat o‘rtasida vaqti vaqti bilan goh aholi, goh chegarachilar o‘rtasida nizolar, otishmalar sodir bo‘lishi to‘xtagani yo‘q.
Izoh (0)