Kataloniya parlamenti XV—XVIII asrlar davomida hududda jodugarlikda ayblanib qatl etilgan ayollarning barchasini aybsiz deb topdi. Bu haqda Ispaniyaning El Correo nashri xabar berdi.
Tarixchilarning hisob-kitoblariga ko‘ra, bu davrda Kataloniyada 700—1000 ga yaqin ayol jodugarlik aybi bilan qatl etilgan. Ularni oqlash to‘g‘risidagi qaror Kataloniya parlamentidagi so‘l va millatchi partiyalar tomonidan qo‘llab-quvvatlandi. Ular “jodugarlarni ovlash”ni femitsidga (ayol bo‘lgani uchun o‘ldirish) qiyoslagan.
Hujjatda, shuningdek, Kataloniya shaharlari hukumati jodugarlikda ayblanib, qurbon bo‘lgan ayollar xotirasi uchun maydon va ko‘chalarning nomini o‘zgartirish masalasini ko‘rib chiqishni taklif qiladi.
Kataloniya XV asr oxirida “jodugarlar” ustidan sud boshlangan Yevropadagi dastlabki mintaqalardan biri bo‘lgan. Ayblanuvchilar (asosan, ayollar) odatda bolalarning to‘satdan o‘limi, tabiiy ofatlar va hosilning kamligi tufayli jodugarlikda gumonlangan. Shu bilan birga, ularni o‘ldirishda o‘tinni tejash uchun olovda yoqish emas, ko‘pincha dorga osish usuli tanlangan.
Avval ham bir qator mamlakatlarda jodugarlikda ayblangan odamlar vafotidan keyin aybsiz deb e’lon qilingandi. Germaniya va Norvegiyada ularning xotirasiga yodgorliklar o‘rnatilgan. Shotlandiya parlamenti XVI—XVIII asrlarda jodugar va sehrgar deb e’lon qilingan ayollar va erkaklarni afv etish to‘g‘risidagi qonun loyihasini ishlab chiqmoqda. Bunday ayblov qo‘yilgan odamlar kamida 3800 nafari ekani taxmin qilinmoqda.
Izoh (0)