Қирғизистон ва Тожикистон чегара ҳудудларидан бирида икки давлат ҳарбийлари ўртасида отишма юз берди. Бу ҳақда Қирғизистон миллий хавфсизлик қўмитасининг давлат чегара хизмати ахборотига таяниб, «ТАСС» хабар қилган.
«Қирғиз-тожик чегарасида кескин вазият ҳукмронлик қилмоқда. Қирғизистон ва Тожикистон чегара хизматлари олиб борган музокаралар якунига кўра Боткен–Исфара йўналишида Тожикистон фуқаролари томонидан тўсиб қўйилган Тўрт-Кўчо қишлоғи йўли яна қайта очилган», – дейилади чегара хизматининг хабарида.
«Аммо маҳаллий вақт билан соат 19:35 да (Тошкент вақти билан 18:35) Боткен туманининг Чир-Добо қишлоғи яқинида тожик томони ўқотар қуролдан фойдалангани ва қирғиз чегарачиларига ўқ узгани туфайли вазият яна ёмонлашган. Тўрт-Кўчо ва Чир-Добо қишлоқлари ҳудудида Қирғизистон ва Тожикистон чегара қўшинларининг аскарлари иштирокида ўзаро отишмалар кузатилган. Тожик томони миномётлар ва гранатомётлардан фойдаланган», – дейилади хабарда. Ҳалок бўлганлар ёки яраланганлар ҳақида маълумот берилмаган.
Тожикистон чегарасига яқин ҳудуддаги қишлоқларда яшовчи аҳоли кескин вазият туфайли ўз хонадонларини тарк этган, дейилади «24.kg» хабарида.
«Чегарачилар ўртасидаги низо содир бўлган ҳудудга яқин қишлоқларда яшайдиган одамлар хонадонларини тарк этмоқда», дейилади хабарда. Шунингдек, агентликнинг ёзишича қирғиз-тожик чегараси участкаларидан биридаги отишма ҳануз давом этмоқда.
Қирғизистоннинг Боткен вилояти маъмурияти берган маълумот бўйича конфликт кузатилган ҳудудда аввало аёллар, болалар ва кекса ёшли кишилар хавфсиз жойга ўтказилган.
Воқеа жойига Боткен вилояти давлат хавфсизлик хизмати қўмитаси чегара хизмати бошлиғи Қиялбек Тўланбаев ва Боткен чегара отряди раҳбари Рустам Миршакиров етиб келган. «Мазкур ҳудуддаги Боткен вилоятининг чегара бўлинмалари кучайтирилган тартибга ўтказилган», – дейилади идора баёнотида.
Тожикистон чегара хизмати ходимлари ҳам Қирғизистон билан чегарада содир бўлган ҳодиса туфайли кучайтирилган тартибга ўтказилган ва бу ҳақда мамлакат махсус хизматларидаги манба «ТАСС»га маълум қилган.
«Тожик-қирғиз чегарасида юзага келган кескинлик сабабли Тожикистон чегара хизмати ходимлари хизматни ўташнинг кучайтирилган тартибига ўтказилган», – дея агентликка маълумот берган Тожикистон ҳукуматидаги манба.
Унинг сўзларига кўра, иккала томоннинг ҳам маҳаллий ҳокимият вакиллари низони ҳал этиш юзасидан тегишли ишларни амалга оширмоқда.
Кейинроқ яна Қирғизистон давлат хавфсизлик қўмитасининг чегара хизмати яна бир баёнот билан чиқиш қилди ва тожик чегарачилари отишмани тўхтатишни истамаётгани, улар томонидан икки томонлама келишувлар, халқаро ҳуқуқ меъёрларига зид бўлган Тожикистон Қуролли кучларининг қуроллари ишлатилаётганини қайд этди. Тожикистон миномётлардан муайян нишонга аниқ ўт очаётгани, асосан, чегара заставалари ва электр тармоқ линияларига ҳужум қилинаётганини билдирди.
Asia-Plus нашри Исфара шаҳри яқинидаги Сомониён қишлоғида чегарадаги низо туфайли яраланганлар сони 11 нафарга етганини хабар қилди. Хабарга кўра, ўқотар қуролдан яраланган 8 нафар ҳарбий ва уч нафар фуқаро шифохонага ётқизилган. Уларнинг ҳолат барқарор ва жабрланганларга травмaтология бўлимларида тиббий ёрдам кўрсатилган. «AКИpress» эса Қирғизистон томонда 4 нафар ҳарбийга жароҳат етганини билдирган. Улар Кўк Тошдан Боткендаги вилоят шифохонасига олиб кетилган. Ҳарбийлар осколка, яъни миномёт зарбасидан кейин учиб келган парча тегиши оқибатида яраланган.
Коллектив хавфсизлик шартномаси ташкилоти бош котиби Станислав Зас тожик ва қирғиз томонларини жанговар ҳаракатларни дарҳол тўхтатишга чақирган. Бу ҳақда КХШТ матбуот котиби Владимир Зайнетдинов маълум қилган. Зас Тожикистон хавфсизлик кенгаши котиби Насрулло Маҳмудзода ҳамда Қирғизистон хавфсизлик кенгаши котиби Марат Иманкулов билан телефон орқали суҳбатлашган.
Тожикистон ва Қирғизистон ўртасидаги бу каби низолар 1990 йиллардан буён кузатилади, уларга икки давлат ўртасида 950 километр чегара ҳудуди белгилаб олинмаган ва унда икки томон келиша олмаётган баҳсли жойлар жуда кўп. Чегарани демаркация ва делимитация қилиш юзасидан музокаралар 2002 йилда бошланган ва шу кунга қадар икки юздан зиёд комиссия йиғилишлари ўтказилиб, ишчи гуруҳлар тузилган. Айни вақтда делимитация ва демаркация қилиш бўйича чегаранинг 550 километрга яқин линияси тартибга солиниши бошланган. Бироқ икки мамлакат ўртасида вақти вақти билан гоҳ аҳоли, гоҳ чегарачилар ўртасида низолар, отишмалар содир бўлиши тўхтагани йўқ.
Изоҳ (0)