Каталония парламенти XV—XVIII асрлар давомида ҳудудда жодугарликда айбланиб қатл этилган аёлларнинг барчасини айбсиз деб топди. Бу ҳақда Испаниянинг El Correo нашри хабар берди.
Тарихчиларнинг ҳисоб-китобларига кўра, бу даврда Каталонияда 700—1000 га яқин аёл жодугарлик айби билан қатл этилган. Уларни оқлаш тўғрисидаги қарор Каталония парламентидаги сўл ва миллатчи партиялар томонидан қўллаб-қувватланди. Улар «жодугарларни овлаш»ни фемицидга (аёл бўлгани учун ўлдириш) қиёслаган.
Ҳужжатда, шунингдек, Каталония шаҳарлари ҳукумати жодугарликда айбланиб, қурбон бўлган аёллар хотираси учун майдон ва кўчаларнинг номини ўзгартириш масаласини кўриб чиқишни таклиф қилади.
Каталония XV аср охирида «жодугарлар» устидан суд бошланган Европадаги дастлабки минтақалардан бири бўлган. Айбланувчилар (асосан, аёллар) одатда болаларнинг тўсатдан ўлими, табиий офатлар ва ҳосилнинг камлиги туфайли жодугарликда гумонланган. Шу билан бирга, уларни ўлдиришда ўтинни тежаш учун оловда ёқиш эмас, кўпинча дорга осиш усули танланган.
Аввал ҳам бир қатор мамлакатларда жодугарликда айбланган одамлар вафотидан кейин айбсиз деб эълон қилинганди. Германия ва Норвегияда уларнинг хотирасига ёдгорликлар ўрнатилган. Шотландия парламенти XVI—XVIII асрларда жодугар ва сеҳргар деб эълон қилинган аёллар ва эркакларни афв этиш тўғрисидаги қонун лойиҳасини ишлаб чиқмоқда. Бундай айблов қўйилган одамлар камида 3800 нафари экани тахмин қилинмоқда.
Изоҳ (0)