Shimoliy Koreya Yapon dengizi tomon qisqa masofaga mo‘ljallangan ikkita ballistik raketani uchirdi. Bu haqda Janubiy Koreyaning Yonhap agentligi mamlakat harbiylariga tayanib, xabar berdi.
Birlashgan shtab boshliqlari qo‘mitasining ma’lum qilishicha, raketalar sharqiy qirg‘oqdagi Xamxin shahri atrofidan uchirilgan. Qo‘mita raketaning uchirilishini diqqat bilan kuzatib borayotganini va shay holatda ekanini bildirgan.
Tokio esa o‘z navbatida, raketalar Yaponiyaning eksklyuziv iqtisodiy zonasidan tashqariga tushganini ma’lum qilgan. Hech qanday zarar qayd etilmagan.
Ta’kidlash kerakki, 2022-yil boshidan buyon bu KXDRning oltinchi marotaba raketa uchirishi hisoblanadi. Shimoliy Koreya o‘zining bundan oldingi raketasini 25-yanvar kuni uchirgan edi. Joriy yildagi birinchi raketasi 5-yanvar kuni, ikkinchisini — 11-yanvarda, uchinchisini — 14-yanvarda uchirgan edi. Shuningdek, 17-yanvar kuni ham Yapon dengizi tomon yana bir snaryad uchirilgan. Kyodo agentligi ma’lumotlariga ko‘ra, gap ballistik raketalar haqida ketmoqda.
Raketalarning uchirilishi fonida AQSh 13-yanvar kuni KXDRga nisbatan BMT tarmoqlari bo‘yicha yangi sanksiyalarni joriy etish taklifini bildirgandi. Mamlakatning BMTdagi doimiy vakili Linda Tomas-Grinfildning so‘zlariga ko‘ra, Vashington har bir raketa uchirilishi BMT Xavfsizlik Kengashi rezolyutsiyasini buzmoqda deb hisoblaydi.
Shundan so‘ng, Shimoliy Koreya AQSh Pxenyanga nisbatan yangi sanksiyalarni joriy etgach, “yanada kuchli va aniq javob” qaytarishga majbur bo‘lishi haqida ogohlantirgandi. “Agarda AQSh shu kabi kontrfrontal pozitsiyani egallashni davom etsa, KXDR bunga yanada kuchli va aniq javob qaytarishga majbur bo‘ladi”, — deyiladi Shimoliy Koreya TIV vakilining bayonotida.
Izoh (0)