Buyuk Britaniya va Norvegiya koronavirusga qarshi emlanganlar chegarani kesib o‘tgandan so‘ng joylashtiriladigan karantin tartibini bekor qildi. Bu haqda mamlakatlarning hukumatlari saytida so‘z boradi.
11-fevraldan boshlab Britaniyada mamlakatga kelgan sayyohlar JSST tomonidan tavsiya qilingan dori vositalari bilan emlangan bo‘lsa, ulardan PZR test topshirish talab etilmaydi. Ular faqatgina emlanish darajasini belgilashi, safar tarixi va aloqa ma’lumotlar keltiriladigan so‘rovnomani to‘ldirishi kerak.
Shu bilan birga, to‘liq emlanmaganlar, xususan, umuman emlanmagan yoki JSST tomonidan tan olinmagan vaksina bilan emlangan odamlar mamlakatga kirishi uchun kamida 48 soat oldin test topshirgan bo‘lishi lozim. 18 yoshgacha bo‘lgan sayyohlar oldingidek chegarada test topshirishi shart emas. Ta’kidlanishicha, koronavirus aniqlangan taqdirda fuqaro o‘zini o‘zi yakkalashi kerak bo‘ladi.
Norvegiya esa 26-yanvardan boshlab mamlakatga kiruvchilarni karantinga olish tartibini bekor qilishga qaror qilgan. Hukumat saytida keltirilishicha, gap umuman emlanmagan yoki JSST ma’qullamagan dori vositalari orqali vaksinatsiyadan o‘tgan turistlar haqida ketmoqda.
Endilikda Norvegiyaga faqat koronavirusga topshirilgan PZR test yoki ekspress-testning salbiy natijasi to‘g‘risidagi ma’lumotnoma bilan kirish mumkin. Mamlakatga kelgan turist yana bitta test topshiradi va unda koronavirus aniqlansa, o‘zini o‘zi yakkalash rejimiga o‘tadi.
Bundan tashqari, chegarani kesib o‘tgan xorijliklar ro‘yxatdan o‘tish so‘rovnomasini to‘ldirishi kerak — bu 16 yoshdan kattalar uchun. Shu bilan birga, Norvegiya kasallanish bilan bog‘liq vaziyat o‘zgarsa yoki virusning yangi varianti aniqlansa, qayta karantin joriy etilishi mumkinligidan ogohlantirgan.
Avvalroq Chexiyada karantin qoidalarini buzgan fuqaro uch yilga qamalishi mumkinligi, Vengriyada koronavirusga qarshi vaksinaning to‘rtinchi dozasi bilan emlanishga ruxsat berilgani, Italiyada 50 yoshdan oshganlar uchun COVID-19 ga qarshi majburiy emlash joriy qilingani to‘g‘risida xabar berilgandi.
Izoh (0)