CNN: АҚШ иттифоқдошлари билан Болгария, Руминия ва Венгрияга 3 минг ҳарбий юборишни муҳокама қилмоқда

АҚШ ва унинг иттифоқчилари Россиянинг Украинага бостириб кириши мумкинлиги сабаб Шарқий Европа мамлакатларига қўшимча ҳарбий контингентни юбориш масаласини муҳокама қилмоқда. Бу ҳақда CNN ўзининг учта манбасига таяниб, хабар берди.

Тахминларга кўра, қўшинлар Болгария, Руминия ва Венгрияга юборилади — ушбу мамлакатларнинг ҳар бирига минг нафардан ҳарбий хизматчи.

22 январь куни АҚШ президентининг Кемп-Дэвиддаги қароргоҳида бўлиб ўтган учрашувда Пентагон юқори мартабали вакили Байденга бир нечта ҳаракатлар режасини тақдим этгани тўғрисида хабар берилганди. Улар минг нафардан 5 минг нафаргача ҳарбий хизматчини вазият ёмонлашса, улар сонини «ўн баробаргача ошириш» имконияти билан Шарқий Европа давлатларига юборишни ўз ичига олади.

Кейинроқ Пентагон расмий вакили Жон Кирби АҚШда 8,5 минг ҳарбий хизматчи юқори шайлик ҳолатига келтирилганини маълум қилди. Улар қисқа муддатда Европага юборилиши мумкин.

Аввалроқ Зеленский АҚШ давлат котиби билан учрашувда Украина армиясини модернизация қилишда ёрдам сўрагани, Канада махсус кучларининг бир қисми Украинага жўнатилгани тўғрисида хабар берилганди. Шунингдек, НАТО Украина яқинида Россия кучлари тўпланаётгани сабаб ўз қуролли кучларини жанговар шай ҳолатга келтираётгани ва Шарқий Европага қўшимча кема ҳамда қирувчи самолётларни юборгани маълум бўлганди.

НАТО бош котиби Йенс Столтенберг альянсга аъзо давлатлар ўз қўшинларини Украинага жойлаштирмаслигини билдирган.