Пётр Порошенко Украинага қайтиб келди. У давлатга хиёнатда айбланиб ҳибсга олиниши мумкин

Украинанинг бешинчи президенти, халқ депутати Пётр Порошенко 17 январь куни эрталаб Киевдаги Жулиани аэропортига етиб келди. Бу ҳақда «UNIAN» хабар берди. Аэропорт яқинида сиёсатчининг 1000-1500 га яқин тарафдорлари тўпланган, деб ёзади «Украинская правда».

Паспорт назоратидан ўтиш вақтида Порошенкога Украина Давлат тергов бюроси терговчилари мурожаат қилиб, унга давлатга хиёнат ва терроризмга ёрдам бериш иши бўйича сўроққа чақирув қоғозини бермоқчи бўлган. Порошенко чақирув қоғозини олишдан бош тортган.

17 январь куни Киевнинг Печерский туман суди Порошенкога ушбу иш бўйича қандай эҳтиёт чораси тайинлашни ҳал қилади. Суд мажлиси маҳаллий вақт билан соат 11:00 га (Тошкент вақти билан 14:00) белгиланган.

Паспорт назорати вақтида Порошенконинг паспорти олиб қўйилган, шундан сўнг собиқ президент унга Украина ҳудудига киришга рухсат берилмаётганини айтган. Тез орада унинг паспорти қайтарилиб, ўзи аэропорт назоратидан ўтган.

Порошенконинг Украинага қайтишидан сал олдин «Левий берег» собиқ президентдан олинган интервьюни чоп этди. «Биринчидан, мен қамоққа тушмайман. Иккинчидан, ҳибсга олинишимга йўл қўймайман. Мен Тимошенко (Украина собиқ бош вазири, 2011 йилда мансабини суиистеъмол қилганликда айбланган) эмасман. Учинчи позиция — Украинани ҳимоя қилиш учун имкон қадар самарали ҳаракат қиламан. Ўзимни ҳимоялаш орқали Украинани ҳимоя қилаётганимга қатъий ишонаман», — деган Порошенко.

2021 йилнинг декабрида Порошенко ўзини республика деб эълон қилган Донецк ва Луганск халқ республикаларидан «2014—2015 йиллардаги ҳарбий қарама-қаршилик шароитида» кўмир етказиб берилгани сабаб қўзғатилган давлатга хиёнат бўйича жиноий ишда гумонланувчига айланганди. Порошенко барча айбловларни рад этган.

Давлат тергов бюроси Порошенко сўроқ учун чақирув қоғозини бермоқчи бўлган терговчиларга эътибор бермагани, сўнг номаълум томонга жўнаб кетганини хабар қилган. «Европа бирдамлиги» партияси Порошенконинг дипломатик ташриф билан Туркия ва Польшага  кетганини, режалаштирилган учрашувлар ва қисқа таътилдан сўнг Украинага қайтишини билдирган.

Январь ойида Киев суди давлатга хиёнат иш бўйича тергов доирасида Порошенконинг мулкини, жумладан Винница ва Киевдаги квартираларини, шунингдек, Козиндаги кўчмас мулкни хатловга олди.

Мухолифат платформаси – «Ҳаёт учун» партияси раҳбари, ОАВ томонидан «Путиннинг чўқинтирган отаси» деб аталувчи Виктор Медведчук ва Украинанинг собиқ энергетика вазири Владимир Демчишин ҳам кўмир етказиб бериш ишида гумон қилинмоқда.