“Barselona” hujumkor yarim himoyachisi Usmon Dembele yangi shartnoma borasida katalonlar bilan kelisha olmadi, deya xabar qilmoqda jurnalist Xerar Romero.
24 yoshli futbolchi klub taklif qilgan shartnomani imzolamasligi va yozda erkin agent maqomida jamoani tark etish niyatida ekanini ma’lum qilgan. Futbolchi qishki transfer oynasida boshqa jamoaga o‘tishni istamayapti.
Dembele o‘zini jahon darajasidagi yulduz deb hisoblaydi va shunga yarasha maosh talab qilmoqda. Futbolchi yangi besh yillik shartnoma uchun “Barselona”dan 200 million yevro (soliqlargacha), shuningdek, kelishuvni imzolaganlik uchun o‘zi va agentiga 20 million mukofot puli talab qilgan.
Diario Sport’ning yozishicha, bu vaziyatda katalonlar birinchi navbatda Dembele fikrini o‘zgartirib qolmasidan taklif etilgan shartnomani qaytarib olmoqchi.
“Barsa” uni yanvarda sotib yuborishga harakat qiladi va shu bois 500 mln yevrolik tovon pulini sezilarli darajada qisqartirmoqchi. Agar Dembele yanvarda jamoani tark etmasa, u holda “Barselona” futbolchini mavsum oxirigacha maydonga tushirmaslik variantini ko‘rib chiqadi. Bu orqali “ko‘k-anorranglilar” jamoaga hurmat bilan munosabatda bo‘lish kerakligini uqtirib qo‘ymoqchi.
Usmon La Liga joriy mavsumida 6 ta o‘yin o‘tkazib, ikkita golli uzatma muallifiga aylandi.
Eslatib o‘tamiz, “Barselona” Dembeleni 2017-yilda 135 million yevro evaziga sotib olgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)