“Manchester Yunayted” hujumchisi Krishtianu Ronaldu ESPN Brazil nashriga intervyu berdi. Unda futbolchi jamoadagi hozirgi holati, tanqidni ko‘tara olmaydigan yoshlar va boshqa qator masalalarga to‘xtaldi.
Ralf Rangnik haqida
U besh hafta avval keldi va ko‘p narsani o‘zgartirdi. G‘oyalarini futbolchilarga singdirish uchun unga vaqt kerak. Rangnik o‘z ishini yaxshi uddalashiga ishonaman. Eng zo‘r o‘yinimizni namoyish etmayotganimizni bilaman, ammo vaziyatni o‘nglash uchun oldinda hali o‘yinlar bor.Futbolchilarning ruhiyati, o‘yin uslubi, tizimini o‘zgartirish oson emas. U buni uddalaydi deb o‘ylayman.
Ole-Gunnar Sulsher haqida
Murabbiyning ketishi har doim qayg‘uli. U bilan birga o‘ynagan davrlarimiz, keyin u mening murabbiyimga aylangani haqida gaplashdik. U ajoyib inson. Sulsher ketganida hammamiz xafa bo‘ldik, ammo bu hayotning bir qismi. Barchasi o‘xshamayotgan bo‘lsa, klub va muxlislar xohlaganidek nimanidir o‘zgartirishga to‘g‘ri keladi. Juda xafa bo‘ldim, shu o‘rinda qarorni ham to‘g‘ri tushundim. Hayot to‘xtab qolmaydi.Yangi murabbiyning g‘oyalariga ko‘nikish uzoq vaqt olishini bilardik. Dastlab, Sulsherning o‘rniga Kerrik keldi, endi esa yana yangi murabbiy. Buncha ko‘p o‘zgarishlarga moslashish qiyin. Shunday bo‘lsa ham yaxshi mavsum o‘tkazishga qodirligimizga ishonaman.
Kuchli to‘rtlikka kirish uchun ruhiyatni o‘zgartirish kerakligi haqidaMenimcha, ruhiyat — eng muhimi. Bizning maqsadimiz minimum kuchli uchlikka kirish bo‘lishi lozim. Boshqasiga ko‘nmayman.
Nimadir yaxshi narsa qurish uchun nimanidir buzishga to‘g‘ri keladi, deb o‘ylayman. Shunday ekan, nega yo‘q bo‘lsin — yangi yil, yangi hayot… “Manchester Yunayted” muxlislar orzu qilgan darajaga chiqa oladi, deb hisoblayman. Ular bunga haqli. Hozir biz o‘zgarishga qodirmiz. Buni qanday sodir bo‘lishini bilaman, lekin aytmayman, agar aytsam bu men tomonimdan qilingan axloqsizlik bo‘ladi. Biz yaxshiroq o‘ynay olishimizni ayta olaman, xolos. Hozirgi holatimizni o‘zgartirishimiz darkor.
Oltinchi, yettinchi yoki beshinchi o‘rinni egallashni istamayman. Men g‘olib bo‘lish, raqobat qilish uchun bu yerdaman. Raqobat taklif qilishga qodirmiz, lekin hali o‘zimizning eng yaxshi darajamizga chiqmadik. Hali ko‘p narsalarni qo‘shishimiz kerak. Biz hammamiz jamoa eng yaxshi bo‘lishi uchun shu yerdamiz. Shunday ekan bu bilan shug‘ullanish kerak.
Yangi yil kirib keldi, yangi sahifani varaqlayapmiz. Bizda g‘alaba qozonish uchun ko‘p narsa bor. Bunga ishonishimiz lozim, aks holda — bu dahshatli ko‘rinish oladi.
Jismoniy holati haqida
Genetik jihatdan o‘zimni 30 yoshdek his qilaman. O‘z tanam va aqlim haqida diqqat bilan qayg‘uraman. Yaqinda insonning tanasi 33 yoshdan keyin istalgan vazifani bajarishi mumkinligi, aql jangi esa haqiqiy urush ekanligini tushundim.
Eng qiyini — shuncha qiyinchiliklardan so‘ng bitta maqsadga diqqatni qaratish, yuqori darajada qolish. Oxirgi yillarda aynan shu bilan shug‘ullanyapman. Aqlim bilan ko‘proq ishlayman. Tanam taklif qilgan narsamni qabul qilishini bilaman, chunki unga hurmat bilan munosabatda bo‘laman va uning ogohlantirishlariga quloq solaman.
Hayotda turli lahzalar bo‘ladi, yaxshi va yomon, ammo yiqilgandan so‘ng o‘rningdan turishga kuch bo‘lishi kerak. Baxtliman va futbolda qolishni istayman, ko‘ramiz, bu nimaga olib boradi. 40, 41, 42 yoshgacha futbol o‘ynay olamanmi, yo‘qmi, bilmoqchiman. Lekin eng asosiysi — bo‘layotgan narsalardan lazzatlanish.
Jamoaga yordam berishi haqidaBunga to‘g‘ri munosabatda bo‘lish lozim. O‘zimga qarayman va o‘ylayman: “Krishtianu, o‘z darajangni oshirish va jamoaga yordam berish uchun nima qilishing kerak? Ha, men biror narsada yaxshiroq bo‘lishim mumkin”. O‘yin davom etar ekan, ba’zi joylarda aqlliroq va ayyorroq bo‘lish kerak.
Barcha o‘yinlar turli xil, futbolchilar har xil, barcha o‘zi xohlagan sxemada o‘ynaydi, stadionlar ham turlicha. O‘yin vaqtida omad kelmagan paytlarda azoblanishga tayyor bo‘lish kerak, jamoaviy o‘ynash uchun barcha birdam bo‘lishi lozim. Aynan shuning uchun jamoa nomi “Manchester Yunayted”. Biz birdam bo‘lishimiz kerak.
Yoshlar tanqidni ko‘tara olmay qolgani haqida
Yoshi katta va yetuk futbolchilar doim yoshlarga yordam berishi mumkin. To‘g‘ri, istisno holatlar bo‘lishi mumkin. Masalan, men maslahat berdim, lekin uni hayotimga tatbiq etmaganman, bu masalada unga maslahat berish qiyin bo‘ladi. Inson bilan kun bo‘yi gaplashib o‘tirish mumkin. Agar ichida hech nima bo‘lmasa, barchasi bekor. 18, 19, 20 yoshimda kattalar men bilan suhbatlashganini eslayman.
O‘zimga o‘zim shunday derdim: “Krishtianu, senga rivojlanish zarurligini bilasan. Ular sendan tajribali, ko‘p narsani biladi”. Ular boshidan ko‘p yomon vaziyatlarni o‘tkazgan. Boshqalar esa tanqidni tushunmaydi. Buni jamoamdagi futbolchilarga nisbatan emas, umumiy aytmoqdaman. Farzandlarim bor, ularga nima deyayotganimni bilaman. Ba’zida qattiqqo‘l bo‘lsang ular aksini qiladi. Suhbatda oraliqni topa olish muhim.
Fikrimcha, hamma narsa ichingdan chiqishi kerak. O‘zingdan faxrlanishing, oynaga qarab, o‘zing uchun hamma narsani berganingni aytishing lozim. Hammamiz shunday qilishimiz kerak, deb o‘ylayman. Shaxsiyat — eng muhimi. Biz yordam berish uchun shu yerdamiz. Kimgadir yordam, qo‘llab-quvvatlash yoki maslahat kerak bo‘lsa men birinchilardan bo‘lib berishga tayyorman. Agar yordamim kerak bo‘lmasa, o‘z ishingni qil, o‘zingni izla va jamoaga yordam berish uchun barcha imkoniyatingni ishga sol.
JCh—2022 o‘tish o‘yinlari haqida
Agar biz Jahon Chempionatiga chiqa olmasak, juda achinarli bo‘ladi, lekin u yerga borishimizga hamon ishonaman. Futbolda ham, hayotda ham og‘ir damlar bo‘ladi, lekin yiqilganingda o‘rningdan turishing kerak.
Portugaliyaning Jahon Chempionatida ishtirok etishiga ishonaman. Oldinda bizni bir yoki ikkita qiyin jang kutib turganini bilamiz. Ishonaman bunga.
Mart oyida biz tayyor bo‘lamiz, haqiqiy jang kechadi. Hayot o‘zi shunaqa, mukammal ssenariy yo‘q. Biz uni qanday bo‘lsa, shundayligicha qabul qilishimiz kerak. Martda biz tayyor bo‘lamiz.
Krishtianu Ronaldu, “Manchester Yunayted” hujumchisi
Izoh (0)