Усмон Дембеле «Барселона»ни тарк этиш қарорига келди. Клуб уни мавсум охиригача ўйинлардан четлатиши мумкин

«Барселона» ҳужумкор ярим ҳимоячиси Усмон Дембеле янги шартнома борасида каталонлар билан келиша олмади, дея хабар қилмоқда журналист Херар Ромеро.

24 ёшли футболчи клуб таклиф қилган шартномани имзоламаслиги ва ёзда эркин агент мақомида жамоани тарк этиш ниятида эканини маълум қилган. Футболчи қишки трансфер ойнасида бошқа жамоага ўтишни истамаяпти.

Дембеле ўзини жаҳон даражасидаги юлдуз деб ҳисоблайди ва шунга яраша маош талаб қилмоқда. Футболчи янги беш йиллик шартнома учун «Барселона»дан 200 миллион евро (солиқларгача), шунингдек, келишувни имзолаганлик учун ўзи ва агентига 20 миллион мукофот пули талаб қилган.

Diario Sport’нинг ёзишича, бу вазиятда каталонлар биринчи навбатда Дембеле фикрини ўзгартириб қолмасидан таклиф этилган шартномани қайтариб олмоқчи.

«Барса» уни январда сотиб юборишга ҳаракат қилади ва шу боис 500 млн евролик товон пулини сезиларли даражада қисқартирмоқчи. Агар Дембеле январда жамоани тарк этмаса, у ҳолда «Барселона» футболчини мавсум охиригача майдонга туширмаслик вариантини кўриб чиқади. Бу орқали «кўк-анорранглилар» жамоага ҳурмат билан муносабатда бўлиш кераклигини уқтириб қўймоқчи.

Усмон Ла Лига жорий мавсумида 6 та ўйин ўтказиб, иккита голли узатма муаллифига айланди.

Эслатиб ўтамиз, «Барселона» Дембелени 2017 йилда 135 миллион евро эвазига сотиб олганди.