Toshkentda Spark panjaraga urilishi oqibatida voyaga yetmagan bolalar halok bo‘ldi, Namanganda yuk mashinasi ag‘darildi. Baxtsiz hodisalar tafsilotlari

Yaqin kunlarda O‘zbekistonda sodir bo‘lgan yo‘l-transport hodisalari tafsilotlarini taqdim etamiz.

Qayd etilishicha, Toshkent shahri Yashnobod tumanida 16-yanvar kuni yo‘l-transport hodisasi sodir bo‘lgan. Shu kuni soat 03:00 atrofida Shohimardon ko‘chasida haydovchilik guvohnomasiga ega bo‘lmagan Y.R. (2005-yilda tug‘ilgan) ishonch qog‘ozisiz Spark avtomashinasi haydab borayotib, rul boshqaruvini yo‘qotgan va yo‘l chetidagi temir panjaraga urilgan.

Oqibatda Spark haydovchisi Y.R. va mashinadagi A.E. ismli yo‘lovchi (2008-yilda tug‘ilgan) olgan jarohatlari tufayli voqea joyida halok bo‘lgan.

O‘rganishlar natijasida YTHga haydovchining tezlik yuqori bo‘lgani uchun rul boshqaruvini yo‘qotgani sabab bo‘lgani aniqlangan.

Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 3-qismi bo‘yicha jinoyat ishi qo‘zg‘atilgan.

Namanganda yuk mashinasi ag‘darildi

Ma’lum qilinishicha, YTH 15-yanvar kuni soat 03:00 atrofida Namangan viloyati Pop tumanida sodir bo‘lgan. Orom aylanma yo‘lidan harakatlanib kelayotgan haydovchi harakat xavfsizligini ta’minlay olmasligi oqibatida yuk avtomashinasi ag‘darilib ketgan.

Hodisa oqibatida jarohat olganlar yo‘q.

Jizzaxda Nexia yo‘lni kesib o‘tayotgan piyodani urib yubordi

Xabar qilinishicha, YTH 12-yanvar kuni soat 00:05 atrofida Jizzax viloyati Paxtakor tumani Oqbuloq qishlog‘i hududidan o‘tgan ichki yo‘lda sodir bo‘lgan. “G‘alaba” mahallasida yashovchi Nexia haydovchisi yo‘lni kesib o‘tayotgan piyoda (2002-yilda tug‘ilgan)ni urib yuborgan.

Oqibatda piyoda bosh miya yopiq jarohati, chap boldir suyagining yopiq sinishi tashxisi bilan tuman tibbiyot birlashmasining travmatologiya bo‘limiga yotqizilgan,

Hozirda holat yuzasidan tergovga qadar tekshiruv olib borilmoqda.