Тошкентда Spark панжарага урилиши оқибатида вояга етмаган болалар ҳалок бўлди, Наманганда юк машинаси ағдарилди. Бахтсиз ҳодисалар тафсилотлари

Яқин кунларда Ўзбекистонда содир бўлган йўл-транспорт ҳодисалари тафсилотларини тақдим этамиз.

Қайд этилишича, Тошкент шаҳри Яшнобод туманида 16 январь куни йўл-транспорт ҳодисаси содир бўлган. Шу куни соат 03:00 атрофида Шоҳимардон кўчасида ҳайдовчилик гувоҳномасига эга бўлмаган Й.Р. (2005 йилда туғилган) ишонч қоғозисиз Spark автомашинаси ҳайдаб бораётиб, рул бошқарувини йўқотган ва йўл четидаги темир панжарага урилган.

Оқибатда Spark ҳайдовчиси Й.Р. ва машинадаги А.Э. исмли йўловчи (2008 йилда туғилган) олган жароҳатлари туфайли воқеа жойида ҳалок бўлган.

Ўрганишлар натижасида ЙТҲга ҳайдовчининг тезлик юқори бўлгани учун рул бошқарувини йўқотгани сабаб бўлгани аниқланган.

Ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми бўйича жиноят иши қўзғатилган.

Наманганда юк машинаси ағдарилди

Маълум қилинишича, ЙТҲ 15 январь куни соат 03:00 атрофида Наманган вилояти Поп туманида содир бўлган. Ором айланма йўлидан ҳаракатланиб келаётган ҳайдовчи ҳаракат хавфсизлигини таъминлай олмаслиги оқибатида юк автомашинаси ағдарилиб кетган.

Ҳодиса оқибатида жароҳат олганлар йўқ.

Жиззахда Nexia йўлни кесиб ўтаётган пиёдани уриб юборди

Хабар қилинишича, ЙТҲ 12 январь куни соат 00:05 атрофида Жиззах вилояти Пахтакор тумани Оқбулоқ қишлоғи ҳудудидан ўтган ички йўлда содир бўлган. «Ғалаба» маҳалласида яшовчи Nexia ҳайдовчиси йўлни кесиб ўтаётган пиёда (2002 йилда туғилган)ни уриб юборган.

Оқибатда пиёда бош мия ёпиқ жароҳати, чап болдир суягининг ёпиқ синиши ташхиси билан туман тиббиёт бирлашмасининг травматология бўлимига ётқизилган,

Ҳозирда ҳолат юзасидан терговга қадар текширув олиб борилмоқда.