Andijonda MIB xodimini pichoq bilan jarohatlagan fuqaro qamoqqa olindi

Andijonda MIB xodimini haqorat qilib, uni pichoq bilan jarohatlagan fuqaro qamoqqa olindi, deb xabar bermoqda “Daryo” muxbiri.

MIB Andijon viloyat boshqarmasi axborot xizmatining ma’lum qilishicha, Jinoyat ishlari bo‘yicha Asaka tumani sudining 15-yanvardagi ajrimiga muvofiq Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan gumon qiluvchi Asaka tumanida yashovchi fuqaro S.J.ga nisbatan qamoqqa olish ehtiyot chorasi qo‘llanilgan.

Eslatib o‘tamiz, Andijonda fuqaro MIB xodimini pichoq bilan jarohatlagani haqida 13-yanvar kuni xabar berilgan edi.

Fuqarolik ishlari bo‘yicha Asaka tumanlararo sudining 2021-yil 21-oktabrdagi ijro varaqasiga ko‘ra, qarzdor A.J. tomonidan Asaka tumani Najmiddin Kubro ko‘chasida joylashgan avtoshohbekatning yo‘lovchilar uchun mo‘ljallangan kutish qismida o‘zboshimchalik bilan qurib olingan savdo do‘koni qurilmasi o‘zining hisobidan majburiy tartibda buzdirilishi belgilangan.

2022-yilning 11-yanvarida noqonuniy qurilmani buzish uchun vakolatli idoralar vakillari ishtirokida majburiy ijro harakatlari o‘tkazilgan. Ijro harakatlari davomida qarzdorning o‘g‘li S.J. do‘konda bo‘lgan oshxona pichog‘i bilan taraflarni qo‘rqitib, davlat ijrochisi X.Mehmonovga tan jarohati yetkazgan. Natijada majburiy ijro harakatlari boshqa kunga qoldirilgan.

Qayd etish lozim, Jinoyat kodeksining 219-moddasida nazarda tutilgan jinoyatlarni sodir etgan shaxslar BHMning 50 baravaridan 100 baravarigacha miqdorda jarima yoki 360 soatgacha majburiy jamoat ishlari yoxud 3 yilgacha axloq tuzatish ishlari yoki 1 yildan 3 yilgacha ozodlikni cheklash yoki 1 yildan 3 yilgacha ozodlikdan mahrum qilish bilan jazolanadi.