A Seriyada to‘xtash nimaligini bilmayotgan “Inter” finallarda toblangan “Yuventus”ga qarshi. Milanda o‘tadigan Italiya Superkubogi haqida

Italiya Superkubogi doirasida “Inter” va “Yuventus” jamoalari 12-yanvar, chorshanba kuni o‘zaro to‘qnash keladi. Mavsumdagi ilk sovrinni qo‘lga kiritishda jamoalarning imkoniyati qanday?

“Inter” 2020/21-yilgi mavsumda Antonio Konte qo‘l ostida A Seriyada chempionlikni qo‘lga kiritgan bo‘lsa, Turinning “Yuventus” klubi Italiya Kubogi bosh sovrinini o‘ziniki qildi. Italiya Superkubogi hisob bo‘yicha 34-bor o‘tkazilmoqda, “Inter” unda besh marta, “Yuventus”esa 9 marta g‘alaba qozongan.

“Inter”

Milanning “Inter” jamoasi Italiya Superkubogida besh marta g‘olib bo‘lgan va bu sovrinlarning to‘rttasi “Juzeppe Meatssa”da qo‘lga kiritilgan. “Nerazzurilar” ishtirokidagi eng birinchi o‘yin 1989-yilda “Sampdoriya”ga qarshi bo‘lib o‘tgan va unda milanliklar 2:0 hisobida g‘alaba qozongan. Undan so‘ng uydagi Superkubok finallarida “Inter”ga faqat “Roma” raqiblik qilgan. “Bo‘rilar” har safar sovrinni qo‘lga kiritishga yaqin kelardi, ammo faqat bir marta ushbu vazifani uddalash nasib etgan: 2007-yilda rimliklar 90-daqiqada Daniele de Rossi tomonidan penaltidan urilgan gol evaziga g‘olib bo‘lgan. Undan bir yil avval “Inter” qo‘shimcha bo‘limlarda “Roma”ni 4:3 hisobida mag‘lub etgandi. 2008-yilgi Superkubokda esa jamoalar penaltilar seriyasiga qadar yetib borgan, unda “nerazzurilar” g‘alaba qozongan. 2010-yilgi Superkubokda esa milanliklar “Roma”ni 3:1 hisobida taslim etgan.

“Inter”ning har bir futbolchisidan xavf kutish mumkin

“Inter” Antonio Konte davri bilan solishtirganda hozirgi kunda hujumkorroq o‘yin namoyish etyapti, Inzagi qanot himoyachilariga ham to‘p bilan oldinga chiqishga imkon beryapti. Ayniqsa bu gap “Latsio”ga qarshi o‘yinda (2:1) o‘z hisobiga gol va golli uzatma yozdirib qo‘ygan Alessandro Bastoniga tegishli. Italiyalik yosh futbolchi ikki yildan so‘ng gol urishga muvaffaq bo‘ldi va joriy mavsumda “Inter” safida gol urgan 16-futbolchiga aylandi. “Nerazzurilar”ning asosiy yetakchilari Lautaro Martines (11 ta gol) va Edin Jeko (8) hisoblanadi. Umuman olganda milanliklarning istalgan futbolchisidan, albatta Samir Handanovichdan tashqari, darvozaga tahdid kutish mumkin.

Xoqon Chalxono‘g‘luning diskvalifikatsiyasi tugab, maydonga qaytmoqda

Simone Inzagi Xoqonni asosan markaziy yarim himoyachi sifatida maydonga tushiradi va u chap qanotga yaqinroq o‘ynaydi. Aynan Chalxono‘g‘lu jamoaning ijodkor futbolchisi va u hujumlarga tezkorlik qo‘shib turadi. “Latsio”ga qarshi bahsda Xoqon yetishmadi, Galyardini esa uning o‘rnini bosa olmadi. Turkiyalik futbolchi hisobida joriy mavsum 6 ta gol va 8 ta golli uzatma mavjud.

“Yuventus”

“Yuventus”ning “Roma”ga qarshi dramatik uchrashuvi (4:3) nafaqat Kyeza va turinliklar uchun, balki Roberto Manchini uchun ham ko‘ngilsiz tugadi. “Keksa sinyora”ning hujumkor yarim himoyachisi 32-daqiqada jarohat oldi va mavsum oxiriga qadar safdan chiqdi. Italiya terma jamoasi bosh murabbiyi Roberto Manchini Jahon Chempionatiga yo‘llanmani qo‘lga kiritish uchun Portugaliyaga qarshi o‘yinda Kyezaning xizmatidan foydalana olmaydi. Superkubok bahsida “Yuventus” Kyezaning o‘rniga boshqa bir Federiko — Bernardeskini sinab ko‘radi.

Massimiliano Allegri bitta o‘yinga 4-4-2 sxemasiga qaytadimi? 

“Yuventus” murabbiyi uchun faqatgina Federiko Kyezaning jarohatigina boshog‘riq emas. Diskvalifikatsiya sabab Xuan Kuadrado va Matteys de Ligt ham ushbu uchrashuvni o‘tkazib yuboradi. Aaron Remzida koronavirus aniqlangan, Leonardo Bonuchchi esa jarohatda. Aleks Sandro va Danilo allaqachon mashg‘ulotlarga qo‘shilgan, ammo ularning ilk daqiqalardan maydonga tushishi so‘roq ostida. Oxirgi o‘yinlarda Allegri 4-2-3-1 sxemasini qo‘llab ko‘rayotgan edi. Kyezaning jarohati va Kuadradoning yo‘qligi murabbiyga 4-4-2 sxemasini yana bir bor sinab ko‘rishiga sabab bo‘lishi mumkin. “Inter” qanotlardan ko‘proq hujum qiladi, ularni to‘xtatish uchun Makkenni va Rabyoni qurbon qilish ehtimoli bor. Chalxono‘g‘lu va Barellaga erkin zona yaratish imkonini bermaslik uchun Lokatelli va Bentankur yarim himoya markazida harakat qiladi.

Murabbiylarning o‘yin oldi fikrlari

Biz tajovuzkorroq va qat’iy o‘yin ko‘rsatishimiz lozim. “Yuventus” bizga muammolar tug‘dirishi mumkinligini bilamiz. Avgust oyida ular chempionlik uchun asosiy da’vogar edi, “Inter” va boshqa jamoalar unga raqobatchi sifatida ko‘rilgandi. Lekin barchasi maydonda hal bo‘ladi. Hozir biz birinchi o‘rindamiz va poyga oxirigacha davom etadi.

“Yuventus” — raqobatbardosh jamoa, Kyellini va Bonuchchi o‘ynaydi, Federiko Kyezaga esa omad tilayman. Uni shaxsan bilmayman, ammo otasi bilan “Latsio”da birga o‘ynaganman. Federiko esa Italiya futboli davomchisi hisoblanadi.

Bu final va unda favoritlar yo‘q. “Yuventus” 8 o‘yindan buyon mag‘lub bo‘lmayapti va “Roma”ga qarshi o‘yinda juda katta ishni bajardi. Ular finallarga o‘rgangan, tarkibida tajribali futbolchilar bor, ammo biz hozir yaxshi davrni boshdan o‘tkazmoqdamiz.

Simone Inzagi, “Inter” bosh murabbiyi

Uzatmalar sifatini oshirishimiz va xotirjam bo‘lishimiz lozim, himoyadan hujumga o‘tishda shoshqaloqlik qilyapmiz, ammo bunday bo‘lmasligi kerak.

“Inter” — yaxshi tayyorgarlik ko‘rgan jamoa, biz har bir epizoddan maksimal foydalanishimiz lozim. O‘yinda g‘alaba qozonishga urinamiz.

Bitta uchrashuvda har narsa bo‘lishi mumkin, asosan yaxshi o‘ynagan jamoa g‘olib bo‘ladi.

Massimiliano Allegri, “Yuventus” bosh murabbiyi

Italiya Superkubogiga oid qiziqarli ma’lumotlar

• Superkubok to‘purari — Paulo Dibala. “Yuventus” futbolchisi 5 ta o‘yinda 4 ta golga mualliflik qilgan;
• “Inter” bosh murabbiyi Simone Inzagi “Latsio” bilan birga ikki marta Italiya Superkubogida zafar quchgan (2017, 2019);
• Superkubokda eng ko‘p ishtirok etgan murabbiylar: Marchello Lippi va Massimiliano Allegri. Ikkala mutaxassis hisobida 6 tadan o‘yin mavjud. Joriy final esa Allegri uchun yettinchisi bo‘ladi.