Muborakning “Mash’al” futbol klubiga yangi bosh murabbiy tayinlandi.
“Gazchilar” matbuot xizmatining yozishicha, klub rahbariyati tavsiyasi va jamoatchilikning fikriga ko‘ra Dilyaver Vaniyev jamoa bosh murabbiyi etib tayinlangan.
10-yanvar kuni “Mash’al”ni o‘tgan mavsumda boshqargan Aleksandr Xomyakovning o‘z arizasiga binoan lavozimidan ozod etilgani to‘g‘risida xabar berilgandi.
Ma’lumot uchun, Vaniyev futbolchilik faoliyati davomida “Yangiyer”, “Zarafshon”, “Navbahor”, “Andijon” va “Mash’al” jamoalarida to‘p surgan. Murabbiylik faoliyatini ham “Mash’al”da boshlagan 47 yoshli mutaxassis o‘tgan mavsumda Xomyakovga yordamchilik qilgandi.
Shuningdek, klub barcha legionerlar bilan xayrlashilganini ma’lum qildi. 2021-yilda jamoa safida harakat qilgan nigeriyalik Okvara Gudvin Chika, Samuel Ononivu, Ifiani Ifiani va Ibi Okoro bilan hamkorlik to‘xtatilgan.
“Mash’al” Superliganing 2021-yilgi mavsumini 12-o‘rinda yakunladi. Jamoa o‘tish o‘yinida Pro-Ligada 3-o‘rinni egallagan “Olimpik”ka 1:3 hisobida yutqazib, quyi ligaga ravona bo‘ldi.
Izoh (0)