Италия Суперкубоги доирасида «Интер» ва «Ювентус» жамоалари 12 январь, чоршанба куни ўзаро тўқнаш келади. Мавсумдаги илк совринни қўлга киритишда жамоаларнинг имконияти қандай?
«Интер» 2020/21 йилги мавсумда Антонио Конте қўл остида А Серияда чемпионликни қўлга киритган бўлса, Туриннинг «Ювентус» клуби Италия Кубоги бош совринини ўзиники қилди. Италия Суперкубоги ҳисоб бўйича 34-бор ўтказилмоқда, «Интер» унда беш марта, «Ювентус»эса 9 марта ғалаба қозонган.
Италия Суперкубоги
12/13 январь, Италия, Милан
«Интер» — «Ювентус» | 01:00
Фото: Getty Images«Интер»
«Интер» «Жузеппе Меацца» стадионида Италия Суперкубогини беш уринишдан тўрттасида қўлга киритганМиланнинг «Интер» жамоаси Италия Суперкубогида беш марта ғолиб бўлган ва бу совринларнинг тўрттаси «Жузеппе Меацца»да қўлга киритилган. «Нераззурилар» иштирокидаги энг биринчи ўйин 1989 йилда «Сампдория»га қарши бўлиб ўтган ва унда миланликлар 2:0 ҳисобида ғалаба қозонган. Ундан сўнг уйдаги Суперкубок финалларида «Интер»га фақат «Рома» рақиблик қилган. «Бўрилар» ҳар сафар совринни қўлга киритишга яқин келарди, аммо фақат бир марта ушбу вазифани уддалаш насиб этган: 2007 йилда римликлар 90-дақиқада Даниэле де Росси томонидан пенальтидан урилган гол эвазига ғолиб бўлган. Ундан бир йил аввал «Интер» қўшимча бўлимларда «Рома»ни 4:3 ҳисобида мағлуб этганди. 2008 йилги Суперкубокда эса жамоалар пенальтилар сериясига қадар етиб борган, унда «нераззурилар» ғалаба қозонган. 2010 йилги Суперкубокда эса миланликлар «Рома»ни 3:1 ҳисобида таслим этган.
«Интер»нинг ҳар бир футболчисидан хавф кутиш мумкин
«Интер» Антонио Конте даври билан солиштирганда ҳозирги кунда ҳужумкорроқ ўйин намойиш этяпти, Инзаги қанот ҳимоячиларига ҳам тўп билан олдинга чиқишга имкон беряпти. Айниқса бу гап «Лацио»га қарши ўйинда (2:1) ўз ҳисобига гол ва голли узатма ёздириб қўйган Алессандро Бастонига тегишли. Италиялик ёш футболчи икки йилдан сўнг гол уришга муваффақ бўлди ва жорий мавсумда «Интер» сафида гол урган 16-футболчига айланди. «Нераззурилар»нинг асосий етакчилари Лаутаро Мартинес (11 та гол) ва Эдин Жеко (8) ҳисобланади. Умуман олганда миланликларнинг исталган футболчисидан, албатта Самир Ҳандановичдан ташқари, дарвозага таҳдид кутиш мумкин.
Хоқон Чалхонўғлунинг дисквалификацияси тугаб, майдонга қайтмоқда
Симоне Инзаги Хоқонни асосан марказий ярим ҳимоячи сифатида майдонга туширади ва у чап қанотга яқинроқ ўйнайди. Айнан Чалхонўғлу жамоанинг ижодкор футболчиси ва у ҳужумларга тезкорлик қўшиб туради. «Лацио»га қарши баҳсда Хоқон етишмади, Гальярдини эса унинг ўрнини боса олмади. Туркиялик футболчи ҳисобида жорий мавсум 6 та гол ва 8 та голли узатма мавжуд.
«Ювентус»
«Ювентус» Федерико Кьезани мавсум сўнггига қадар йўқотди«Ювентус»нинг «Рома»га қарши драматик учрашуви (4:3) нафақат Кьеза ва туринликлар учун, балки Роберто Манчини учун ҳам кўнгилсиз тугади. «Кекса синьора»нинг ҳужумкор ярим ҳимоячиси 32-дақиқада жароҳат олди ва мавсум охирига қадар сафдан чиқди. Италия терма жамоаси бош мураббийи Роберто Манчини Жаҳон Чемпионатига йўлланмани қўлга киритиш учун Португалияга қарши ўйинда Кьезанинг хизматидан фойдалана олмайди. Суперкубок баҳсида «Ювентус» Кьезанинг ўрнига бошқа бир Федерико — Бернардескини синаб кўради.
Массимилиано Аллегри битта ўйинга 4-4-2 схемасига қайтадими?
«Ювентус» мураббийи учун фақатгина Федерико Кьезанинг жароҳатигина бошоғриқ эмас. Дисквалификация сабаб Хуан Куадрадо ва Matteйс де Лигт ҳам ушбу учрашувни ўтказиб юборади. Аарон Рэмзида коронавирус аниқланган, Леонардо Бонуччи эса жароҳатда. Алекс Сандро ва Данило аллақачон машғулотларга қўшилган, аммо уларнинг илк дақиқалардан майдонга тушиши сўроқ остида. Охирги ўйинларда Аллегри 4-2-3-1 схемасини қўллаб кўраётган эди. Кьезанинг жароҳати ва Куадрадонинг йўқлиги мураббийга 4-4-2 схемасини яна бир бор синаб кўришига сабаб бўлиши мумкин. «Интер» қанотлардан кўпроқ ҳужум қилади, уларни тўхтатиш учун Маккенни ва Рабьони қурбон қилиш эҳтимоли бор. Чалхонўғлу ва Бареллага эркин зона яратиш имконини бермаслик учун Локателли ва Бентанкур ярим ҳимоя марказида ҳаракат қилади.
Мураббийларнинг ўйин олди фикрлари
Биз тажовузкорроқ ва қатъий ўйин кўрсатишимиз лозим. «Ювентус» бизга муаммолар туғдириши мумкинлигини биламиз. Август ойида улар чемпионлик учун асосий даъвогар эди, «Интер» ва бошқа жамоалар унга рақобатчи сифатида кўрилганди. Лекин барчаси майдонда ҳал бўлади. Ҳозир биз биринчи ўриндамиз ва пойга охиригача давом этади.«Ювентус» — рақобатбардош жамоа, Кьеллини ва Бонуччи ўйнайди, Федерико Кьезага эса омад тилайман. Уни шахсан билмайман, аммо отаси билан «Лацио»да бирга ўйнаганман. Федерико эса Италия футболи давомчиси ҳисобланади.
Бу финал ва унда фаворитлар йўқ. «Ювентус» 8 ўйиндан буён мағлуб бўлмаяпти ва «Рома»га қарши ўйинда жуда катта ишни бажарди. Улар финалларга ўрганган, таркибида тажрибали футболчилар бор, аммо биз ҳозир яхши даврни бошдан ўтказмоқдамиз.
Симоне Инзаги, «Интер» бош мураббийи
Узатмалар сифатини оширишимиз ва хотиржам бўлишимиз лозим, ҳимоядан ҳужумга ўтишда шошқалоқлик қиляпмиз, аммо бундай бўлмаслиги керак.«Интер» — яхши тайёргарлик кўрган жамоа, биз ҳар бир эпизоддан максимал фойдаланишимиз лозим. Ўйинда ғалаба қозонишга уринамиз.
Битта учрашувда ҳар нарса бўлиши мумкин, асосан яхши ўйнаган жамоа ғолиб бўлади.
Массимилиано Аллегри, «Ювентус» бош мураббийи
Италия Суперкубогига оид қизиқарли маълумотлар
- Суперкубок тўпурари — Пауло Дибала. «Ювентус» футболчиси 5 та ўйинда 4 та голга муаллифлик қилган;
- «Интер» бош мураббийи Симоне Инзаги «Лацио» билан бирга икки марта Италия Суперкубогида зафар қучган (2017, 2019);
- Суперкубокда энг кўп иштирок этган мураббийлар: Марчелло Липпи ва Массимилиано Аллегри. Иккала мутахассис ҳисобида 6 тадан ўйин мавжуд. Жорий финал эса Аллегри учун еттинчиси бўлади.
Изоҳ (0)