Zangiotada IIB xodimlari tomonidan kaltaklangani aytilgan fuqaro bo‘yicha ma’lumot berildi

Zangiotada onasiga tazyiq o‘tkazib, uyida janjal ko‘targan shaxs unga nisbatan IIB xodimlari kuch ishlatganini aytayotgani to‘g‘risida xabar berilgandi. Ichki ishlar vazirligi matbuot kotibi Shohrux G‘iyosov o‘zining Telegram-kanalida aslida holat qanday bo‘lgani yuzasidan tayyorlangan videolavhani e’lon qildi.

Ma’lum qilinishicha, 9-noyabr kuni soat 20:00 larda ushbu fuqaroning onasi tuman IIBga murojaat qilib, o‘g‘li muntazam ravishda spirtli ichimliklar iste’mol qilishi va ayni damda ham mast holatda janjal ko‘tarayotganini bildirgan.

“Bu (o‘g‘li — tahr.) yana ichkilikka kirib, to‘rt kundan buyon to‘polon. Men notinchman, uyda yotig‘li bo‘lib qolganman… Kecha ham qiyomat to‘polon qilgan”, — deya murojaat qilgan ayol.

Onaning so‘zlariga ko‘ra, U.M. ismli o‘g‘li masjidda qorovullikdan bo‘shab, yana spirtli ichimlikka ruju qo‘ygan va uyda janjal chiqarishni boshlagan. Ushbu xabarga asosan tungi xizmatga biriktirilgan IIO xodimlari voqea joyiga yetib borganida fuqaro U.M. mast holatda baqir-chaqir qilib, oila a’zolari va atrofdagilarni bezovta qilayotganiga guvoh bo‘lgan.

“Men u paytda o‘zimda bo‘lmaganman. Nima deganim, ichki ishlar xodimlarini so‘kkanmanmi, boshqa qilganmanmi, bilmayman”, — deydi fuqaro.

Tuman ichki ishlar binosida kaltaklanganini aytgan fuqaro tibbiy ko‘rikdan o‘tkazilgan. Zangiota tumani Tez tibbiy yordam bo‘limining ma’lumotnomasiga ko‘ra, unda mastlik holati va chap ko‘zida shilinish jarohati borligi ma’lum qilingan.

Avvalroq e’lon qilingan xabarda fuqaro U.M. o‘ziga nisbatan bayonnoma rasmiylashtirilayotganida IIBning ma’muriy binosidan qochib ketib, go‘yoki unga nisbatan kuch ishlatilgani haqida yolg‘on ma’lumotlarni tarqatgani aytilgandi. Unga nisbatan sodir etgan ma’muriy huquqbuzarliklariga qo‘shimcha ravishda Ma’muriy javobgarlik to‘g‘risidagi kodeksning 40-moddasi (tuhmat) bilan materiallar rasmiylashtirilib sudga taqdim etilgan.