Toshkent viloyatida deputat va IIB xodimlari o‘rtasida janjal aks etgan video bo‘yicha rasmiy ma’lumot berildi

Toshkent viloyatining O‘rta Chirchiq tumani “Amfiteatr” majmuasida 28-avgust kuni O‘zbekiston mustaqilligining 30 yilligiga bag‘ishlangan bayram tadbirlarini o‘tkazish jarayonida tuman ichki ishlar organlari xodimlari hamda O‘rta Chirchiq tumani Xalq deputatlari kengashi deputati Feruza Babasheva va Chirchiq shahar xalq deputatlari kengashi deputati Jahongir To‘laganov o‘rtasida ziddiyatli holat vujudga keldi. Holat aks etgan video ijtimoiy tarmoqlarda tarqaldi.

Viloyat IIBB matbuot xizmatining yozishicha, tadbirda jamoat tartibini saqlash va xavfsizlikni ta’minlash, bayram tadbiriga kelgan shaxslarni karantin qoidalariga amal qilgan holda tibbiy niqobda kirishlarini nazorat qilish bo‘yicha O‘rta Chirchiq tumani IIB xodimlari xizmatga jalb etilgan.

Xizmatdagi xodimlar tomonidan bayram tadbiriga kelgan Feruza Babasheva va Jahongir To‘laganov tibbiy niqobsiz bo‘lganligi sababli kirish yo‘lagida to‘xtatilgan va karantin qoidalariga rioya qilgan holda himoya niqobini taqib kirishlari haqida aytilgan.

Shunda ular o‘zlarini deputat deb og‘zaki ravishda tanishtirgan va karantin qoidalariga amal qilishdan bosh tortib, xodimlarning qonuniy talablarini bajarmagan.

“Jarayonda Feruza Babasheva o‘zining deputat ekanligini va daxlsizlik huquqi borligini pesh qilib, xizmat vazifasini bajarayotgan IIB xodimlarini ‘sharmandalar’ deb kamsitgan va ushbu jarayonini to‘g‘ridan to‘g‘ri 7 daqiqa 53 soniya davomida videotasvirga olib, onlayn tarzda Facebook ijtimoiy tarmog‘iga uzatgan”, — deya qayd etilgan IIBB xabarida.

IIV axborot xizmati rahbari Shohrux G‘iyosovning ma’lum qilishicha, Toshkent viloyati Ichki ishlar bosh boshqarmasi tomonidan vaziyat to‘liq o‘rganilgan hamda voqea ishtirokchilarining harakatlariga huquqiy baho berish maqsadida to‘plangan materiallar prokuratura organlariga yuborilgan.

Deputat Feruza Babashevaning so‘zlariga ko‘ra, Jahongir To‘laganov bilan tuman ma’muriy markaziga kelganida darvoza oldida 50 nafardan ortiq bolalar va 6—7 nafar yosh bolali ayollar turgan bo‘lgan, IIB xodimlari ularni bayramga kiritmayotgan bo‘lgan. Deputatlarning kirishiga esa hech qanday qarshilik qilishmagan, tibbiy niqob taqish ham so‘ralmagan.

Darvoza oldida turgan bolalar va bolali ayollar nega kiritilmayotgani so‘ralganida “odam ko‘p, sahna sinib ketishi mumkin”, degan vaj ko‘rsatilgan. Feruza Babasheva ularni o‘zi tartibga solib turishini aytib, kiritgan. Bir bolali ayolni esa IIB xodimlari ushlab olib qaytargan. Buni ko‘rgan deputat Jahongir To‘laganov ularning qilayotgan ishi noto‘g‘riligini aytgan.

“O‘sha ayol ham birovning kelini, qizi. Qo‘lida bola turgan ayolning qo‘lidan ushlab, kuch ishlatib tortib tashlayapti. Unday qilmang, ayolni qo‘yib yuboring, deb aytdim. Shundan so‘ng IIB xodimi men bilan tortishib ketdi”, — degan Jahongir To‘laganov va aslida niqob bu bahona ekanligini, niqob taqmagan fuqaroni mahkamaga olib borish shart emasligi, joyida bayonnoma tuzilib, ma’muriy javobgarlikka tortilishini ta’kidlab o‘tgan.

“Shu payt IIB xodimlarining o‘sha yerda turgan kattalaridan biri Jahongirni mashinaga tiqlaring, bo‘limda gaplashamiz bu bilan, degan buyruqni berdi. IIB xodimlari esa buyruqni so‘zsiz bajarib, Jahongirni sudray boshlashdi. Tabiiyki, men tumanimizga kelgan mehmon deputatning yonini oldim va noqonuniy xatti-harakatlari, deputatlik maqomi to‘g‘risida tushuntira boshladim”, — degan Feruza Babasheva va shu sababli Facebook orqali to‘g‘ridan to‘g‘ri efir qilib, video olishga majbur bo‘lganini bildirgan.

Ma’lumot uchun, “Xalq deputatlari viloyat, tuman va shahar kengashi deputatining maqomi to‘g‘risida”gi qonunga ko‘ra, deputat o‘zining vakolatlari muddati mobaynida daxlsizlik huquqiga ega. Tegishli Xalq deputatlari kengashining roziligisiz deputat mazkur hududda jinoiy javobgarlikka tortilishi, ushlab turilishi, qamoqqa olinishi yoki sud tartibida beriladigan ma’muriy jazoga tortilishi mumkin emas.