«Толибон» ўзининг янги Вазирлар Маҳкамаси таркибига ағдарилган ҳукумат аъзоларини қўшмайди. Бу ҳақда Афғонистон бош вазири ўринбосари мулла Абдулғани Бародарга таяниб, TOLOnews телеканали хабар берди.
Бародарнинг сўзларига кўра, АҚШ толибларга мамлакат собиқ ҳукуматининг айрим аъзоларини исмларини тақдим этиб, уларни амалдаги Вазирлар Маҳкамаси таркибига киритиш, шу орқали ҳукуматни коалицияга айлантиришни маълум қилган. Бироқ мулланинг айтишича, бу амалга ошмайди.
Мулла Абдулғани Бародар собиқ ҳукумат амалдорларини «коррупцияга ботганликда» айблаб, уларнинг ҳатто бир нечтасини янги таркибга киритиш «Афғонистон ислом амирлиги яхлитлигига» путур етказишини таъкидлаган.
«Бу инсонлар биз билан ҳукуматда бўла олмайди, чунки улар беш киши бўлса ҳам ҳукуматимиз обрўсига путур етказади ва биз бундай инсонлар ҳукуматимизни ағдаришини истамаймиз», — дейди у.
Унинг қайд этишича, агар жаҳон ҳамжамияти «Толибон»ни расмий даражада тан олмасликни давом этса, Афғонистон иқтисодий инқирозга юз тутади ва бу нафақат ушбу мамлакатга, балки қўшни давлатлар ҳамда бутун дунёга салбий таъсирини кўрсатмай қолмайди.
Эслатиб ўтамиз, 2021 йил август ойида ҳокимиятни эгаллаган «Толибон» ҳаракатининг юқори лавозимли аъзоси Ваҳидулла Ҳошимий Афғонистон демократик давлатга айланмаслиги, унда шариат қонунлари амал қилишини айтганди. Унинг сўзларига кўра, Афғонистонда ҳокимият тузилмаси «Толибон» ҳукмронлигининг аввалги даври: 1996—2001 йиллардаги давлат тузилишига ўхшаш бўлади.
Сентябрь ўрталарида «Толибон» Аёллар масалалари бўйича вазирликни тугатиб, унинг ўрнига Саховатни тарғиб қилиш ва иллатларни йўқотиш вазирлигини тузгани, декабрь ойида Афғонистон миллий армиясини шакллантиришга киришгани ҳақида хабар берилганди.
Изоҳ (0)