KXDR Yapon dengizi tomonga noma’lum snaryadni uchirdi. Bu haqda Janubiy Koreya Birlashgan shtab boshliqlari qo‘mitasiga tayanib, Yonhap agentligi xabar berdi.
Kyodo agentligining Yaponiya hukumatiga tayanib yozishicha, snaryad ballistik raketa bo‘lishi mumkin. Mamlakat Sohil xizmati ma’lumotlariga ko‘ra, snaryad Toshkent vaqti bilan soat 04:23 da qulagan.
NHK telekanalining ma’lum qilishicha, Yaponiya bosh vaziri Fumio Kisida snaryadning uchirilishi bo‘yicha kerakli ma’lumotlarni to‘plash bo‘yicha topshiriq bergan va “batafsil tezkor tahlil” o‘tkazilishini bildirgan. U “KXDR o‘tgan yildan boshlab muntazam raketalar uchirayotganidan” afsusda ekanini ma’lum qilgan.
Janubiy Koreyaning yuqori martabali shaxslar favqulodda holatda Milliy xavfsizlik kengashi yig‘ilishini o‘tkazib, Shimoliy Koreya bilan dialogni qayta tiklash muhimligini ta’kidlagan.
“Yig‘ilishda Milliy xavfsizlik kengashi a’zolari ichki va xalqaro barqarorlik favqulodda holatda bo‘lgan vaqtda raketaning uchirilishidan xavotirda ekanliklarini bildirgan… Koreyalararo munosabatlardagi keskinlik va turg‘unlikni kamaytirish uchun Shimoliy Koreya bilan muloqotni qayta tiklash muhimligi ta’kidlandi”, — deyiladi xabarda.
Yaponiya hukumatining bosh kotibi Xirokadzu Matsuno o‘z navbatida KXDR tomonidan raketalar uchirilishi butun mintaqa uchun xavf tug‘dirishini ma’lum qilgan. “Bu mamlakatimiz va butun mintaqa xavfsizligi va tinchligiga tahdid soladi, shuningdek, butun jahon hamjamiyatining jiddiy muammosi hisoblanadi”, — dedi u.
Avvalroq AQSh KXDR tomonidan ballistik raketalarning ishlab chiqarilishi mintaqadagi vaziyatni beqarorlashtirishini ma’lum qilgani, Janubiy Koreya Kim Chen Inning Koreyalararo urush tugagani haqidagi deklaratsiyani tilga olishini yuqori baholagani, AQSh KXDRga nisbatan dushmanlik niyati yo‘qligini ma’lum qilgani, Shimoliy Koreya suvosti kemasi uchun mo‘ljallangan ballistik raketani sinagan bo‘lishi mumkinligi haqida xabar berilgandi.
Izoh (0)