Prezident Qosim-Jo‘mart To‘qayev Qozog‘iston hukumatining iste’fosi to‘g‘risidagi qarorni imzoladi. Bu haqda prezident matbuot xizmati xabar berdi.
Qarorga ko‘ra, Qozog‘iston bosh vazirining birinchi o‘rinbosari Alixon Smoilov bosh vazir vazifasini bajaruvchi etib tayinlangan.
“Qozog‘iston Respublikasi hukumatining iste’fosi qabul qilinsin. Qozog‘iston Respublikasi bosh vaziri vazifasini bajarish vaqtincha Alixon Smoilov zimmasiga yuklansin”, — deyiladi hujjat matnida.
Eslatib o‘tamiz, 2019-yilning fevralida Qozog‘istonning birinchi prezidenti Nursulton Nazarboyev hukumat iste’fosini qabul qilgan va Asqar Maminni bosh vazir vazifasini bajaruvchi etib tayinlagandi.
2-yanvardan beri Qozog‘istonda namoyishlar bo‘lib o‘tmoqda. U Qozog‘istonning Mang‘istov viloyati Janaozen shahrida avtomobil egalari suyultirilgan gaz narxi ikki baravarga (60 tengedan 120 tengega) ko‘tarilganidan norozi bo‘lib, ommaviy mitingga chiqishi bilan boshlangan edi. Shundan keyin, namoyishlar Aqtau viloyati markazida ham bo‘lib o‘tdi, so‘ngra Qozog‘istonning boshqa hududlariga, jumladan poytaxt Nur-Sulton shahriga va sobiq poytaxt Olmaotaga ham tarqala boshladi.
4-yanvar kuni Qozog‘istonda politsiya hamda gaz narxining keskin oshganiga qarshi chiqayotgan namoyishchilar o‘rtasida to‘qnashuvlar kuzatildi. Olmaotadagi Respublika maydonida to‘plangan namoyishchilarga qarshi kuchishlatar tizim xodimlar yorug‘lik chiqarib, shovqin soluvchi granatalar qo‘llagan, olomon politsiya mashinalariga hujum qilib, ularni yoqib yuborgan. “Sputnik”ning qayd etishicha, shahar hokimiyati binosi qurshab olingan. Agentlik vakilining so‘zlariga ko‘ra namoyishchilar bir nafar politsiyachi kaltaklagan. Maydonga mingga yaqin odam to‘plangan. Qosim-Jo‘mart To‘qayev Olmaota shahri va Mang‘istov viloyatida 19-yanvarga qadar favqulodda holat tartibini joriy qildi.
Avvalroq To‘qayev topshirig‘iga ko‘ra Mang‘istov viloyatidagi vaziyatni ko‘rib chiqish uchun hukumat komissiyasi tuzilgan edi. Shuningdek, viloyatdagi norozilik namoyishlari fonida Olmaota shahridagi markaziy Respublika maydoni yopib qo‘yilgani xabar qilingandi. Qozog‘iston prezidenti gaz narxini pasaytirishni talab qilgan namoyishchilarni muloqotga chaqirgan.
Izoh (0)