Kaliforniyada sud hay’ati Theranos biotexnologik startap asoschisi Elizabet Xolmsni investorlarga firib berishda aybdor deb topdi. Bu haqda CNN xabar berdi.
Sud hay’ati Xolmsni 11 ta bandning 4 tasi bo‘yicha aybdor deb topdi. Tadbirkor 20 yilgacha ozodlikdan mahrum qilinishi mumkin, ammo advokatning so‘zlariga ko‘ra, unga maksimal muddat tayinlanishi ehtimoldan yiroq. Shuningdek, Xolms bir million dollar jarimaga tortilishi mumkin.
Xolms bemorlarni aldash bilan bog‘liq yana to‘rtta ayblov bo‘yicha oqlandi. Bundan tashqari, sud hay’ati investorlarni aldashning uchta holati bo‘yicha bir ovozdan qaror qabul qila olmagan. Ushbu epizodlar yangi sud jarayoni doirasida ko‘rib chiqilishi mumkin.
Xolmsga qachon sud hukmi chiqarilishi hozircha noma’lum.
Elizabet Xolms Theranos kompaniyasiga 2003-yilda asos solgan. Kompaniya go‘yoki Xolms ixtiro qilgan texnologiya asosida qonni bir zumda tahlil qiluvchi uskunalar ishlab chiqarishga va’da bergandi. 2014-yilga kelib Theranos’ning qiymati 9 milliard dollarga baholandi.
2015-yilda Xolms aytgan texnologiya ishlamayotgani, Theranos qon tahlilini yashirin ravishda boshqa kompaniyalarning uskunalarida o‘tkazayotgani, ularning natijalari esa noto‘g‘ri ko‘rsatilayotgani ma’lum bo‘ldi. 2018-yilda Theranos’ning faoliyati tugatildi, 2021-yilda Xolms ustidan sud boshlandi.
Izoh (0)