Қозоғистон президенти ҳукумат истеъфосини қабул қилди

Президент Қосим-Жўмарт Тўқаев Қозоғистон ҳукуматининг истеъфоси тўғрисидаги қарорни имзолади. Бу ҳақда президент матбуот хизмати хабар берди.

Қарорга кўра, Қозоғистон бош вазирининг биринчи ўринбосари Алихон Смоилов бош вазир вазифасини бажарувчи этиб тайинланган.

Эслатиб ўтамиз, 2019 йилнинг февралида Қозоғистоннинг биринчи президенти Нурсултон Назарбоев ҳукумат истеъфосини қабул қилган ва Асқар Маминни бош вазир вазифасини бажарувчи этиб тайинлаганди.

2 январдан бери Қозоғистонда намойишлар бўлиб ўтмоқда. У Қозоғистоннинг Манғистов вилояти Жанаозен шаҳрида автомобиль эгалари суюлтирилган газ нархи икки бараварга (60 тенгедан 120 тенгега) кўтарилганидан норози бўлиб, оммавий митингга чиқиши билан бошланган эди. Шундан кейин, намойишлар Ақтау вилояти марказида ҳам бўлиб ўтди, сўнгра Қозоғистоннинг бошқа ҳудудларига, жумладан пойтахт Нур-Султон шаҳрига ва собиқ пойтахт Олмаотага ҳам тарқала бошлади.

4 январь куни Қозоғистонда полиция ҳамда газ нархининг кескин ошганига қарши чиқаётган намойишчилар ўртасида тўқнашувлар кузатилди. Олмаотадаги Республика майдонида тўпланган намойишчиларга қарши кучишлатар тизим ходимлар ёруғлик чиқариб, шовқин солувчи гранаталар қўллаган, оломон полиция машиналарига ҳужум қилиб, уларни ёқиб юборган. «Спутник»нинг қайд этишича, шаҳар ҳокимияти биноси қуршаб олинган. Агентлик вакилининг сўзларига кўра намойишчилар бир нафар полициячи калтаклаган. Майдонга мингга яқин одам тўпланган. Қосим-Жўмарт Тўқаев Олмаота шаҳри ва Манғистов вилоятида 19 январга қадар фавқулодда ҳолат тартибини жорий қилди.

Аввалроқ Тўқаев топшириғига кўра Манғистов вилоятидаги вазиятни кўриб чиқиш учун ҳукумат комиссияси тузилган эди. Шунингдек, вилоятдаги норозилик намойишлари фонида Олмаота шаҳридаги марказий Республика майдони ёпиб қўйилгани хабар қилинганди. Қозоғистон президенти газ нархини пасайтиришни талаб қилган намойишчиларни мулоқотга чақирган.