Jahon sog‘liqni saqlash tashkiloti (JSST) bosh direktori Tedros Adanom Gebreyesus matbuot anjumanida koronavirusning “omikron” va delta variantlari dunyoda COVID-19 ning yangi to‘lqinini keltirib chiqarishi mumkinligini aytdi. Uning so‘zlari tashkilot saytida keltirilgan.
“Delta va ‘omikron’ hozir ikki tomonlama tahdid bo‘lib, ular bilan kasallanish holatlari soni rekord darajada oshib bormoqda, bu esa kasalxonaga yotqizish va o‘limlar sonini yana keskin oshirmoqda. Men delta bilan bir vaqtda kezib yurgan ‘omikron’ yanada yuqumliroq ekani, bu ikkisi ‘kasallanish sunamisi’ga sabab bo‘layotganidan juda xavotirdaman”, — dedi JSST bosh direktori.
JSST rahbarining fikricha, delta bilan birga “omikron”ning tarqalishi shundoq ham zaiflashgan sog‘liqni saqlash tizimiga katta bosim o‘tkazishda davom etmoqda.
Gebreyesusning ta’kidlashicha, agar mamlakatlar vaksinatsiya orqali jamoaviy immunitetni yaxshilamasa, koronavirus rivojlanishda davom etib, sog‘liqni saqlash tizimlariga tahdid solaveradi. JSST rahbari vaksinalar haqidagi noto‘g‘ri ma’lumotlar koronavirusga qarshi emlanmaganlar orasida o‘lim darajasining yuqori bo‘lishiga olib kelganini qayd etdi.
Tashkilot rahbarining qo‘shimcha qilishicha, 2021-yilda dunyoda koronavirusdan 3,5 million o‘lim qayd etilgan bo‘lsa, 2020-yilda bu ko‘rsatkich 1,8 million edi. Shu bilan birga, Tedros Adanom Gebreyesus nekbinlikni saqlab qolayotganini va pandemiyaning o‘tkir bosqichi 2022-yilda tugashiga umid qilayotganini aytdi.
27-dekabr kuni AQShda 440 000 kishida koronavirus aniqlangandi. Kasallanish bo‘yicha rekordalar bir qancha Yevropa davlatlari — Fransiya, Italiya, Gretsiya, Portugaliya va Angliyada ham qayd etilgan. Rasmiylar, bunday yuqori raqamlar Rojdestvo davrida hisobot berishning kechikishi bilan qisman bog‘liq bo‘lishi mumkinligini bildirdi.Kasallanishlar sonining ko‘payishi fonida Parij prefekturasi 11 yoshdan oshgan aholiga 31-dekabrdan boshlab ko‘chalarda himoya niqoblari taqishni majburiy etib beilgiladi.
Izoh (0)