Жаҳон соғлиқни сақлаш ташкилоти (ЖССТ) бош директори Тедрос Аданом Гебрейесус матбуот анжуманида коронавируснинг «омикрон» ва дельта вариантлари дунёда COVID-19 нинг янги тўлқинини келтириб чиқариши мумкинлигини айтди. Унинг сўзлари ташкилот сайтида келтирилган.
«Дельта ва ‘омикрон’ ҳозир икки томонлама таҳдид бўлиб, улар билан касалланиш ҳолатлари сони рекорд даражада ошиб бормоқда, бу эса касалхонага ётқизиш ва ўлимлар сонини яна кескин оширмоқда. Мен дельта билан бир вақтда кезиб юрган ‘омикрон’ янада юқумлироқ экани, бу иккиси ‘касалланиш цунамиси’га сабаб бўлаётганидан жуда хавотирдаман», — деди ЖССТ бош директори.
ЖССТ раҳбарининг фикрича, дельта билан бирга «омикрон»нинг тарқалиши шундоқ ҳам заифлашган соғлиқни сақлаш тизимига катта босим ўтказишда давом этмоқда.
Гебрейесуснинг таъкидлашича, агар мамлакатлар вакцинация орқали жамоавий иммунитетни яхшиламаса, коронавирус ривожланишда давом этиб, соғлиқни сақлаш тизимларига таҳдид солаверади. ЖССТ раҳбари вакциналар ҳақидаги нотўғри маълумотлар коронавирусга қарши эмланмаганлар орасида ўлим даражасининг юқори бўлишига олиб келганини қайд этди.
Ташкилот раҳбарининг қўшимча қилишича, 2021 йилда дунёда коронавирусдан 3,5 миллион ўлим қайд этилган бўлса, 2020 йилда бу кўрсаткич 1,8 миллион эди. Шу билан бирга, Тедрос Аданом Гебрейесус некбинликни сақлаб қолаётганини ва пандемиянинг ўткир босқичи 2022 йилда тугашига умид қилаётганини айтди.
27 декабрь куни АҚШда 440 000 кишида коронавирус аниқланганди. Касалланиш бўйича рекордалар бир қанча Европа давлатлари — Франция, Италия, Греция, Португалия ва Англияда ҳам қайд этилган. Расмийлар, бундай юқори рақамлар Рождество даврида ҳисобот беришнинг кечикиши билан қисман боғлиқ бўлиши мумкинлигини билдирди.Касалланишлар сонининг кўпайиши фонида Париж префектураси 11 ёшдан ошган аҳолига 31 декабрдан бошлаб кўчаларда ҳимоя ниқоблари тақишни мажбурий этиб беилгилади.
Изоҳ (0)