Avstriyaning sobiq kansleri Sebastyan Kurs amerikalik tadbirkor Piter Til tomonidan asos solingan Thiel Capital investitsiya firmasida global strateg bo‘lib ishlaydi. Bu haqda u OE24 telekanaliga ma’lum qilgan.
Telekanal ma’lumotlariga ko‘ra, ekspertlar Kursning kelajakdagi yillik daromadini 500 ming yevroga baholamoqda — bu uning kansler sifatida olgan yillik daromadidan taxminan 190 ming yevroga ko‘p.
Bloomberg kompaniyaga yaqin manbasiga tayanib yozishicha, sobiq kansler kompaniyada Yevropa Ittifoqi va Avstriya siyosati bo‘yicha maslahatchi bo‘lib ishlaydi.
Kurs va Til 2017-yilda Myunxen xavfsizlik konferensiyasida tanishgan.
Avvalroq Österreich gazetasi Kursning atrofidagi manbalarga tayanib, 2022-yilda u AQShdagi xususiy kompaniyada yiliga 500 ming yevro evaziga ishlay boshlashi haqida xabar bergandi. Kronen Zeitung gazetasi esa sobiq kansler Kremniy vodiysidagi kompaniyalardan birida fevral oyida menejer sifatida vazifasiga kirishishini yozgan.
Kurs 2017-yilning dekabrida Avstriya kansleri bo‘lgandi. O‘shanda u 31 yoshda edi va Yevropadagi eng yosh hukumat rahbariga aylangan. 2019-yilning may oyida uning hukumati siyosiy mojaro fonida ishonchsizlik votumini olgan va kansler iste’foga chiqqan, biroq navbatdan tashqari parlament saylovlaridan keyin u lavozimiga qaytgan.
2021-yilning oktabr oyida Kurs korrupsiya mojarosi tufayli butunlay iste’foga chiqdi. Tergov Kurs va uning eng yaqin sheriklarini korrupsiya va ishonchni suiiste’mol qilishda aybladi. Kanslerning atrofidagi odamlar Österreich gazetasiga pora berib, Avstriya xalq partiyasi haqida ijobiy fikrlardan iborat so‘rovnomalar haqida yozishni so‘raganlikda gumon qilindi. Tergov versiyasiga ko‘ra, mansabni suiiste’mol qilish 2016—2018-yillarda amalga oshirilgan. Mamlakat Moliya vazirligi nashrdagi reklama e’lonlarini moliyalashtirish uchun budjet mablag‘laridan foydalanib, evaziga u yerga material joylashtirishni talab qilgani aytildi.
Kursning o‘zi bu ayblovlarni rad etdi va kansler lavozimida qolishini aytdi, biroq 9-oktabr kuni “tartibsizlikning oldini olish va barqarorlikni ta’minlash” uchun o‘z lavozimini tark etayotganini e’lon qildi. 2-dekabr kuni esa sobiq kansler siyosatdan butunlay ketayotganini ma’lum qildi.
Piter Til — asli nemis millatiga mansub amerikalik milliarder, PayPal asoschilaridan biri, venchur investor.
Izoh (0)