Misrda noqulay ob-havo sharoiti sabab uch kishi vafot etdi. Bu haqda Misr sog‘liqni saqlash vazirligi rasmiy vakili Xusam Abdul G‘afforga tayanib “TASS” xabar qilgan.
Jumladan, Kafr-ash-Shayx viloyatida xo‘l simlarni ushlab olgan erkak kuchli elektr toki urishi oqibatida halok bo‘lgan. Yana bir odam sirpanchiq yo‘lda sodir bo‘lgan yo‘l-transport hodisasi oqibatida vafot etgan.
Bundan tashqari Iskandariyada kuchli yomg‘irdan keyin ikki qavatli uy qulab tushgan va vayronalar ostidan bir kishining jasadi kavlab olingan.
Ob-havo injiqliklari tufayli mamlakatdagi olti viloyatda favqulodda holat tartibi joriy etilib, maktablardagi darslar ham bekor qilingan. Qayd etilishicha, kuchli yomg‘irlar va tuman atmosfera frontini yuzaga keltirgan.
Qizil dengiz sohillaridagi Hurgada kurortida do‘l yog‘ib, yashil maysalar va palmalar qor bilan qoplangan. Ijtimoiy tarmoqlarda favqulodda vaziyatdan keyin mazkur manzara aks etgan videolar tarqalgan.
Yomg‘irlar mamlakatdagi boshqa bir kurort hudud Sinay yarimorolini ham sinovdan o‘tkazmoqda. Sinayning tog‘oldi hududlarida qor yog‘ishi kutilmoqda. Qohira aholisi ham 2022-yilni kuchli kuz yomg‘irlari bilan qarshiladi, Misr poytaxtida avval ham yanvar boshida bunday ob-havo bo‘lganini ko‘pchilik eslay olmayapti. Misrdagi bunday noqulay ob-havo hafta oxirigacha davom etishi taxmin qilinmoqda.
Avval 2021-yil noyabr oyida Misrda yomg‘irdan keyin ko‘chalarni chayon bosgan, ularning hujumidan 3 kishi halok bo‘lgan va 500 ga yaqin odam jabrlangandi.
Izoh (0)