Janubiy Afrika repsublikasi poytaxti Keyptaunda joylashgan mamlakat parlamenti binosida yong‘in sodir bo‘ldi. Bu haqda shahar meriyasi rasmiy ma’lumot bergan, deb yozmoqda Times Live.
Parlament binosi olov ichida qolgan va alanga binoning tom qismiga ham o‘tgan, deya ma’lum qilgan meriyaning xavfsizlik va qo‘riqlash qo‘mitasi a’zosi Jey Pi Smit.
“Hozircha yong‘in to‘liq bartaraf etilgani yo‘q, bino devorlarida yoriqlar paydo bo‘lgani haqidagi axborot ham rasman tasdig‘ini topdi”, — degan u gazetaga intervyu bergan vaqtida.
Smitning aniqlik kiritishicha yong‘in haqidagi ma’lumot 2-yanvar kuni mahalliy vaqt bilan 05:00 (Toshkent vaqti bilan 08:00) kelib tushgan. Dastlabki axborotga ko‘ra yong‘in uchinchi qavatdagi ofis xonalarida boshlangan, keyin alanga sport zali tomonga harakatlangan.
Olovni o‘chirishga 36 nafar o‘t o‘chiruvchi safarbar etilgan, biroq ular qo‘shimcha yordam kuchlari kelishini so‘ragan. Halok bo‘lganlar yoki jarohatlanganlar haqida ma’lumot kelib tushmagan.
Shahar ma’muriyati ham favqulodda vaziyatlar xizmatlarining rasmiylari ham hozircha yong‘inning kelib chiqish sabablari haqida ma’lumot bermagan, deya yozgan AFP.
JAR parlamenti Keyptaundagi qonun chiqaruvchi organ hisoblanadi. Parlament ikki palata: Provinsiyalar milliy kengashi (yuqori palata) hamda Milliy assambleyadan (quyi palata) iborat.
Janubiy Afrika respublikasi parlamenti majmuasi uch binoda faoliyat olib boradi. Kompleksning eng keksa binosi 1884-yilda qurilgan, yangi binolar esa 1920–1980-yillar oralig‘ida bunyod etilgan (aynan shu binolarda Milliy kengash faoliyati tashkil qilinadi).
Izoh (0)