Checheniston rahbari Ramzan Qodirov hamda uning ota-onasi Ahmad va Aymani Qodirovlar respublikada xizmat ko‘rsatgan huquq himoyachilari, deb e’lon qilindi.
Qodirovlar oilasini “Chechenistonda xizmat ko‘rsatgan huquq himoyachisi” medali bilan taqdirlash to‘g‘risidagi buyruqni hududdagi inson huquqlari bo‘yicha ombudsmani Nurdi Nuhajiyev imzoladi, deya xabar bergan “Grozniy” telekanali.
Ombudsman Qodirovlarning “inson huquqlarini ta’minlash, davlatchilikni mustahkamlash, fuqarolarning ijtimoiy-iqtisodiy huquqlarini ro‘yobga chiqarish, har bir inson va jamiyat farovonligini oshirish uchun shart-sharoit yaratishga, shuningdek, keng ko‘lamli insonparvarlik yordami va xayriyalarga qo‘shgan ulkan hissasini” qayd etgan.
Eslatib o‘tamiz, avvalroq Ramzan Qodirovning to‘ng‘ich qizi, Checheniston madaniyat vaziri lavozimini egallab turgan 23 yoshli Ayshat “Respublikada xizmat ko‘rsatgan madaniyat xodimi” unvoni va “Inson huquqlarini himoya qilgani uchun” medali bilan taqdirlangan edi.
Dekabr o‘rtalarida Qodirov yana bir qizi, Grozniy shahri maktabgacha ta’lim departamenti boshlig‘i Xadijat Qodirovani “Checheniston Respublikasi oldidagi xizmatlari uchun” medali bilan taqdirlagan.
Sentabr oyida Rossiya prezidenti Vladimir Putin Ramzan Qodirovni III darajali “Vatan oldidagi xizmatlari uchun” ordeni bilan taqdirlagan edi. Avgust oyida esa Putin Grozniy xalqaro aeroportiga Ramzan Qodirovning otasi, Checheniston birinchi prezidenti Ahmad Qodirov nomini bergandi.
Izoh (0)