Дунё ва ўзбек спортига оид 29 декабрнинг энг муҳим хабарлари дайжести билан танишинг.
Ўзбекистон
Жаҳон чемпионлигини қўлга киритган Нодирбек Абдусатторов президент томонидан мукофотланди
Ўзбекистон президенти Шавкат Мирзиёев шахматнинг рапид йўналиши бўйича Польшада ўтган Жаҳон чемпионатида ғолиб бўлган Нодирбек Абдусатторовни мукофотлаш тўғрисидаги фармонни имзолади.
Фармонга кўра, 17 ёшли ўзбекистонлик шахматчи «Мард ўғлон» давлат мукофоти билан тақдирланди ҳамда президент кўрсатмаси билан унга Тошкент шаҳридан 2 хонали хонадон совға қилинади.
Ўзбек спортида 2021 йилнинг энг яхшилари аниқланди
Тошкентдаги Ҳилтон меҳмонхонасида спорт соҳасида Ўзбекистоннинг 2021 йилдаги энг яхшиларини аниқлаш маросими бўлиб ўтди. Унда қатор номинациялар бўйича ғолиблар аниқланди.
Йилнинг энг яхши спортчиси икки йўналиш бўйича аниқланди. Мухлислар талқинига кўра, боксчи Баҳодир Жалолов ғолиб бўлган бўлса, экспертлар оғир атлетикачи Акбар Жўраевни эътироф этган.
«Навбаҳор» вакили ЙТҲ оқибатида ҳалок бўлди
«Навбаҳор U-18» жамоаси ҳимоячиси Самандар Йигиталиев 29 декабрь куни автоҳалокатга учраб, бевақт ҳаётдан кўз юмди. Қатор клублар, шунингдек, ПФЛ ва ЎФА футболчининг яқинларига ҳамдардлик билдирган.
Йигиталиев «Навбаҳор» ёшлар жамоасида 94-рақам остида ҳаракат қиларди.
Жаҳон
«Реал» ва «Барселона» коронавирусдан азият чекмоқда
Каталонлар сафида коронавирусга чалингандан сони 7 нафарга етди. 29 декабрь кунги маълумотларга кўра, Усмон Дембеле, Самюуэль Умтити ва Гавида вирус аниқланган.
Аввалроқ Хорди Альба, Дани Алвес, Клеман Лангле ва Алекс Бальде COVID-19 билан оғриганди.
«Реал»да тўрт нафар футболчининг таҳлили инфекцияга ижобий хулоса берган. Булар: дарвозабон Тибо Куртуа, ярим ҳимоячилар Федерико Вальверде, Эдуардо Камавинга ва ҳужумчиси Винисиус Жуниор.
Ҳар икки жамоа 2 январь куни Ла Лигада ўйин ўтказади. «Барселона» «Мальорка» билан баҳс олиб борса, «Реал» клуби «Хетафе» майдонида меҳмон бўлади.
Ла Лига карантин қоидаларини кучайтирди
Мамлакат коронавируснинг кенг тарқалиши оқибатида Ла Лига раҳбарияти янги чекловларни киритди.
Унга кўра, футбол ўйинларида томошабинларнинг максимал сиғими 100 фоиздан 75 фоиз туширилган. Шунингдек, стадионга ташриф буюрадиган мухлислар тиббий ниқобда бўлиши мажбурий этиб қўйилди. Уларга трибуналарда овқатланиш ва тамаки чекиш ман этилган, бироқ томошабинларга сув ичишга рухсат берилади.
Жон Терри «Челси»га қайтди
Лондонликлар афсонаси бундан кейин клуб академиясида маслаҳатчи мураббий сифатида фаолият олиб боради. У академия футболчилари ва мураббийлари билан ишлайди.
Машғулотлардан ташқари Терри ҳамкасблари билан фикр алмашиб боради, шунингдек, ёш футболчилар ва уларнинг ота-оналари билан алоқада бўлади. Жон «Челси»даги янги ишини январь ойидан бошлайди.
Бунга қадар Терри уч йил давомида «Астон Вилла»да ёрдамчи мураббий сифатида фаолият юритганди.
«Арсенал» устози Микель Артета иккинчи марта коронавирусга йўлиқди
«Канонирлар» матбуот хизмати испаниялик мутахассисда вирус аниқланганини маълум қилди. Артета ўз уйида изоляцияга олинган. Қайд этиш керак, Микель 2020 йилнинг март ойида ҳам коронавирус юқтириб олганди.
«Арсенал»нинг кейинги ўйини 1 январь куни «Манчестер Сити»га қарши кечади. Мутахассис бу учрашувни ўтказиб юборади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)