O‘zbekiston prezidenti Shavkat Mirziyoyev Polshaning Varshava shahrida bo‘lib o‘tgan shaxmat bo‘yicha jahon chempionatida g‘oliblikni qo‘lga kiritgan va mazkur sport turining rapid yo‘nalishida jahonning eng yosh chempioni sifatida e’tirof etilgan Nodirbek Abdusattorovni mukofotlash to‘g‘risidan farmon imzoladi.
Farmonga ko‘ra, Nodirbek Abdusattorov “Mard o‘g‘lon” davlat mukofoti bilan taqdirlandi hamda prezident ko‘rsatmasi bilan unga Toshkent shahrida 2 xonali xonadon sovg‘a qilinadi.
Eslatib o‘tamiz, O‘zbekistonlik grossmeyster Nodirbek Abdusattorov 28-dekabr kuni Polshaning Varshava shahrida bo‘lib o‘tgan shaxmat musobaqasining rapid yo‘nalishida g‘oliblikka erishdi va Jahon chempioniga aylandi.
Nodirbek va uch nafar shaxmatchi Magnus Karlsen, Yan Nepomnyashiy, Fabiano Karuana 13 tur yakunlariga ko‘ra 9,5 ochkodan to‘pladi. Shundan so‘ng g‘olib nomini aniqlash uchun taybreykka murojaat qilindi.Taybreykda Abdusattorovga rossiyalik Yan Nepomnyashiy raqiblik qildi. Abdusattorov dastlabki raundni qora donalarda o‘tkazdi hamda unda durang qayd etildi. Keyingi partiyada o‘zbekistonlik shaxmatchining qo‘li baland keldi.
Nodirbek Abdusattorov 2017-yilda, 13 yoshida grossmeysterlik unvonini olgan. 2021-yil yanvar holatiga ko‘ra, Abdusattorov shaxmat tarixidagi eng yosh beshinchi grossmeyster bo‘lib turibdi. U 2018-yilda O‘zbekiston terma jamoasi safida Butunjahon shaxmat Olimpiadasida birinchi o‘rinni qo‘lga kiritgandi va Prezident sovg‘asi — Spark avtomobilini qabul qilib olgandi.
Qayd etish kerak, Abdusattorov Magnus Karlsenni mag‘lub etgan ikkinchi o‘zbekistonlik shaxmatchiga aylandi. 2018-yilda 16 yoshli Shamsiddin Vohidov Sankt-Peterburgda norvegiyalik shaxmatchidan ustun kelgandi.
Mavzuga doir:
Izoh (0)