2020-yilning fevral oyida Toshkentning Yakkasaroy tumanidagi 81 tup daraxt kesilgani uchun quruvchidan undirilgan qariyb 2 milliard so‘m O‘zbekiston Ekologiya va atrof-muhitni muhofaza qilish qo‘mitasi hisob raqamiga o‘tkazib berildi. Bu haqda poytaxt Ekologiya boshqarmasi xabar berdi.
Ma’lum qilinishicha, 81 tup daraxt noqonuniy kesilgani yuzasidan huquqbuzar Building and Supplies MChJ tomonidan yetkazilgan jami moddiy zarar — 1 891 263 000 so‘m O‘zbekiston Ekologiya va atrof-muhitni muhofaza qilish davlat qo‘mitasi hisob raqamiga o‘tkazilgan.
Eslatib o‘tamiz, 2020-yilning fevralida Building and Supplies kompaniyasi Yunus Rajabiy ko‘chasidagi bir nechta turar joy binolari orasidagi 0,5 gektar maydonga ko‘p qavatli uylar qurishni rejalashtirgan edi. Kompaniya amaldagi moratoriyga qaramasdan, 81 ta daraxtni kesgani jamoatchilik noroziligiga sabab bo‘lgan va shahar rahbariyati hamda hukumatining e’tiborini tortgandi.
Daraxtlarni kesishga ruxsat bergan Yakkasaroy tuman hokimining o‘rinbosari Abduvosilxon Sattorovga nisbatan Jinoyat kodeksining 205-modda (hokimiyat yoki mansab vakolatini suiiste’mol qilish) 2-qismi “a” bandi, Building and Supplies ta’sischisi Abdurahim Qodirovga nisbatan esa 198-modda (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) 2-qismi bilan bilan jinoyat ishi qo‘zg‘atilgan.
Biroq oradan bir yarim yildan ziyodroq vaqt o‘tsa ham, undirilgan mablag‘lar Ekologiya qo‘mitasi hisobiga o‘tkazib berilmadi. Dekabr o‘rtalarida mazkur masalaga Oliy Majlis Qonunchilik palatasi deputati Rasul Kusherbayev e’tibor qaratdi. U Toshkent shahar prokuraturasi hamda Ekologiya va atrof-muhitni muhofaza qilish davlat qo‘mitasiga jinoyat ishi natijalariga aniqlik kiritish maqsadida rasmiy so‘rovlar yuborgan. Davlat ekologiya qo‘mitasi deputatning so‘roviga undirilgan mablag‘lar hamon Toshkent prokuraturasi hisobida ekanini ma’lum qilgan.
Poytaxt prokuraturasi Rasul Kusherbayev 9-noyabr kuni yo‘llagan so‘rovga javob qaytarmagan. Bu haqda o‘zining Telegram kanalida xabar bergan deputat ko‘p o‘tmay postni o‘chirib tashlagan va bosim bo‘lgani to‘g‘risidagi savollarga izoh bermagan.
Bosh prokuraturaning nashrga tasdiqlashicha, 1,89 milliard so‘m rostan ham shahar prokuraturasi hisobida turibdi. Idora ma’lumotlariga ko‘ra, jinoyat ishi bo‘yicha tergov 2020-yilning 10-iyulida Jinoyat-protsessual kodeksining 364-modda (dastlabki tergovni to‘xtatish asoslari va tartibi) 1-qismi bilan to‘xtatilgan.
Deputat so‘rovidan keyin 2021-yil 5-dekabr kuni tergovoldi surishtiruvlari qayta tiklangan.
Izoh (0)