Jizzax viloyati hokimining Mirziyoyev tomonidan “siyosatga xiyonat qilgan” deb topilgan sobiq o‘rinbosari Akrom Rahmonqulovga nisbatan 2021-yilning yanvarida jinoyat ishi qo‘zg‘atilgan edi. Bosh prokuratura matbuot xizmati boshlig‘i Hayot Shamsutdinov Rahmonqulovga nisbatan qo‘zg‘atilgan jinoyat ishi 2021-yilning iyun oyida yakunlanib, Toshkent viloyat sudiga yuborilganini “Daryo”ga ma’lum qilgandi.
Oliy sudning ma’lum qilishicha, 2021-yil 29-dekabr kuni Toshkent viloyat sudida ushbu jinoiy ish ko‘rib chiqildi.
Jizzax viloyati hokimi o‘rinbosari lavozimida ishlagan Akrom Rahmonqulov va boshqalarga oid jinoyat ishi yuzasidan e’lon qilingan sud hukmiga ko‘ra:
Akrom Rahmonqulov Jinoyat kodeksining 167-moddasi 3-qismi “a”, “v” bandlari (o‘zlashtirish yoki rastrata yo‘li bilan talon-toroj qilish), 184-moddasi 3-qismi (soliqlar yoki boshqa majburiy to‘lovlarni to‘lashdan bo‘yin tovlash), 189-moddasi 1-qismi (savdo yoki xizmat ko‘rsatish qoidalarini buzish), 205-moddasi 2-qismi “a”, “b” bandlari (hokimiyat yoki mansab vakolatini suiiste’mol qilish), 207-moddasi 1-qismi (mansabga sovuqqonlik bilan qarash), 209-moddasi 2-qismi “a”, “b” bandlari (mansab soxtakorligi), 243-moddasida (jinoiy faoliyatdan olingan daromadlarni legallashtirish) nazarda tutilgan jinoyatlarni sodir qilganlikda aybdor deb topilgan.
Unga 2 yil muddatga mansabdorlik va moddiy javobgarlik lavozimlarida ishlash huquqidan mahrum qilinib, 7 yil 6 oy ozodlikdan mahrum qilish jazosi hamda bazaviy hisoblash miqdorining 500 baravari miqdorida ya’ni, 111 500 000 so‘m jarima jazosi tayinlandi.
Shuningdek, sud hukmi bilan Akbar Rahmonqulov (“J-Quruvchi” MCHJ direktori), Alisher Rahmonqulov (“Ravon Yo‘l Invest” MChJ, “Sogdiana pipeplast” MChJ va “Jizzax savdo lyuks” MCHJlar direktori), Abror Rahmonqulov (“Zenatkor Sayhan Kon Sanoat” MCHJ direktori), Adham Rahmonqulov (“Zenatkor temir beton buyumlari” MChJ direktori) va yana 20 dan ortiq shaxsga turli jazolar tayinlangan.
Eslatib o‘tamiz, 10-yanvar kuni Jizzax shahrida yangi qurilayotgan ko‘p qavatli uyning bir qismi qulab tushgan edi. FVV va Bosh prokuraturaning qayd etishicha, voqea oqibatida tan jarohati olgan va halok bo‘lgan fuqarolar bo‘lmagan. Ma’lum qilinishicha, qulab tushgan bino yonidagi 6 qavatli inshootning ham poydevorlarida cho‘kish alomatlari kuzatilgan bo‘lib, hozirda u xavfli holatda turibdi. Halokatni o‘rganish maqsadida bosh vazirning birinchi o‘rinbosari Ochilboy Ramatov boshliq hukumat komissiyasi tuzilgan. Shuningdek, mazkur holat yuzasidan o‘tkazilgan tergovga qadar tekshiruv natijasiga ko‘ra, Jizzax viloyati qurilish sohasida hududiy nazorat inspeksiyasi mansabdor shaxslariga nisbatan Jinoyat kodeksining 207-moddasi (mansabga sovuqqonlik bilan qarash) bilan jinoyat ishi qo‘zg‘atilgan.
Ma’lumot uchun, Jizzax viloyati hokimining sobiq o‘rinbosari Akrom Rahmonqulov 2018-yilda lavozimga tayinlangach, uyushgan jinoiy guruh tuzib, 494 milliard so‘mlik 82 ta obyektda qurilish-ta’mirlash ishlarini o‘zining rahnamoligidagi 9 ta pudrat tashkilotiga topshirib, qurilish ishlari hajmini sun’iy ravishda oshirilgan narxlarda rasmiylashtirish, qo‘shib yozish orqali qariyb 20 milliard so‘mlik budjet mablag‘larini talon-toroj qilgandi. Bosh prokuratura bu hozirgacha tergovda aniqlangan ma’lumotlar ekanini aytgandi.
Izoh (0)