Tojikiston va Afg‘onistonning elektroenergeteka kompaniyalari 2022-yil uchun Afg‘onistonga elektr energiyasi yetkazib berish bo‘yicha shartnoma imzoladi. Hujjat Da Afghanistan Breshna Sherkat (DABS) va “Barki tojik” kompaniyalari o‘rtasidagi muzokaralar yakunlari bo‘yicha imzolandi, deyiladi afg‘on kompaniyasining saytida e’lon qilingan qisqa xabarda.
Qayd etilishicha, hujjatni DABS rahbari Hafiz Muhammad Amin va “Barki tojik” kompaniyasi bosh direktori Mirzo Ismoilzoda imzolagan. Xabarda hujjat imzolangan vaqt va joy, shuningdek, afg‘onistonlik iste’molchilar uchun yetkazib beriladigan Tojikiston elektr energiyasining hajmi va narxi ko‘rsatilmagan. Lekin kelishuvga erishilgan paytdagi fotosurat ilova qilingan.
Eslatib o‘tamiz, ikki davlat energetika kompaniyalari bunday shartnomalarni har yilning oxirida kelgusi yil uchun tuzadi.
Amaldagi shartnomaga ko‘ra, Tojikiston 2021-yil oxirigacha Afg‘onistonga 1,5 milliard kilovatt-soat elektr energiyasi yetkazib berishi kerak edi. Afg‘oniston har bir kilovattga 110 kV elektr uzatish liniyasi uchun 3 sent va 220 kV elektr uzatish liniyasi uchun 4,5 sent to‘laydi.
Mavzuga doir: “Tolibon” elektr energiyasi bo‘yicha O‘zbekiston oldidagi barcha qarzini uzishga va’da berdi
Afg‘onistondan tashqari, Tojikistonning elektr energiyasi O‘zbekistonga ham yetkazib beriladi.
Tojikistonda 2021-yilning 11 oyida elektr energiyasi ishlab chiqarish 18,7 milliard kilovatt-soatni tashkil etdi, bu 2020-yilning shu davriga nisbatan 5,7 foizga ko‘pdir, deyiladi xabarda.
Izoh (0)